Chris Johnson ku Minister Plasterk – potrèt: Pieter Hofmann
DEN HAAG – “Kisas nos mester wak e modelo britániko bon”, lider di delegashon Chris Johnson (Saba) ta bisa durante e konferensha pa sera e siman di Hulanda Karibense na Den Haag. “Ei nan ta regla hopi asuntu riba e nivel di gobièrnu di mas abou. Te ainda nos ta sinti manera tin muchu kos ku ta regla eksternamente kaminda nos mes por regla nan.”
Johnson a referí na un presentashon ku e miembronan di e delegashon a haña e siman aki. E lidernan di e delegashonnan karibense durante e rueda di prensa a elaborá e relashonnan entre e paisnan di Reino.
Sint Eustatius tabata ousente awe despues di e instrukshon ku e isla a haña ayera. Na ministerio di Asuntunan Interior i Relashonnan den Reino (BZK) sí a firma e plannan di vários aña di Saba i Boneiru. Ta te ora Sint Eustatius kumpli ku su debernan finansiero lo sigui papia tokante un plan pa vários aña.
E lider di e delegashon boneriano Clark Abraham – potrèt: Pieter Hofmann
Clark Abraham (Boneiru) tabata kontentu ku e kontribushon di e frakshonnan di Tweede Kamer den un kombersashon anterior ku e Bestuurscollegenan. E parlamentarionan koutelosamente a bisa ku mester tin mas espasio pa outonomia pa e islanan. El a ripití su punto di bista ku pueblo di Boneiru na promé lugá mester por ekspresá su mes den un referèndem tokante e elaborashon di e relashon di estado aktual.
Solidario
Abraham ta spera ku e problemanan entre Sint Eustatius i Hulanda lo no stroba e koperashon di Hulanda ku e otro islanan. “Nos tin hopi interes komun i nos ta solidario. Nos ta insistí serka ministerio di BZK pa ehekutá tur kos ku ta konta pa nos tur normalmente.”
Outor Pieter Hofmann