Un bus chiki ku ‘a slag’riba dje ta kore yega na e skol. Michelle Gumbs ta para papia ku ko-alumnonan – potrèt Janita Monna
WILLEMSTAD – Djaweps tur wowo tabata riba e departamento di havo vwo di Scholengemeenschap Bonaire, Liseo Boneriano. Ei atardi lat a publiká e resultadonan di e èksamennan final.
Presidente interino di direktiva Karel Visser, èks alumno di SGB, ta haña e dia aki mas kandente ku e dia ku e mes a tende si el a slag. “Mi ta spera ku awe mi por duna hopi hende pabien”, e ta bisa.
Komoshon
E skol a disidí di no divulgá e porsentahe di slag te ora ku e resultado di e hèrèksamennan tambe ta konosí. Ofishalmente pasobra e maneho di skol ke trankilidat pa e alumnonan ku mester pasa un hèrèksamen ainda. Pero kisas a skohe pa esaki tambe pa motibu di e komoshon ku a surgi ora ku aña pasa solamente 33 porshento di e alumnonan di vwo a slag den un tiru. E mal resultadonan di èksamen e tempu ei tabata motibu pa pregunta den Tweede Kamer.
Aygeron Chirino djaweps ta para hari na skol. E ta un di e alumnonan di e klas vwo 6 notorio di 2014. Aña pasá el a zak. E biaha aki tampoko e no a slag, pero kasi si. “Mi tabata falta nèt un di dies punto pa spañó. Mi por hasi hèrèksamen i lo mi slag sigur.” E no a tuma nada na pechu di loke a bisa i skibi tokante su klas. E aña aki el a siña mihó. “I nos a haña beilès pa matemátika i kímika. Esei a yuda sigur.”
Konfiansa
Dosente Heida van den Tillaar tabata mèntòr di klas vwo 6. “Mi a purba espesialmente pa duna e alumnonan konfiansa. Tin di nan a pèrdè esaki. Kada bes atrobe mi a bisa nan ‘bo por, no ta pòrnada bo ta den vwo 6’. Un gran parti a logra. Mi ta mira hopi kara kontentu!”
Michelle Gumbs ku aña pasá a zak pa su diploma di havo tambe ta kana yega kontentu di dje na Liseo. “Si, m’a slag.” Michelle a ekspresá krítika pisá riba e skol i e tabata haña ku e dosentenan mester a kuminsá di duna lès mas mihó. E ta satisfecho kon e aña a kore. “Nan a guia nos mas mihó, nos a haña mas training pa èksamen.”
Beilès
Mayornan tambe tin e impreshon ku e alumnonan a bai pasa èksamen mihó prepará. “Aña pasá berdaderamente tin kos a bai bon malu”, un mama ta konta. “Mi yu hòmber na mitar di aña a tende ku su pakete di materia no tabata klòp.” Awor el a hasi èksamen di vwo pa di dos be i el a slag. “Na kuminsamentu di aña tabatin un evaluashon i for di e dia ei tabatin bon kontakto ku e mèntòr i e lider di e tim. Nan a skucha e alumnonan: ora esakinan a bati alarm pasobra hopi di nan tabatin problema ku matemátika, a bini beilès.”
Mientres ku e ambiente ta bira mas i mas alegre i e muzik ta bira mas duru e alumnonan i nan mayornan ta yega skol unu unu. E dosentenan ta duna nan pabien. Presidente di direktiva Visser ta pará den plenchi di skol. Entretantu el a duna ministerio di OCW e kantidatnan di alumno ku a slag. E ta bisa esaki so: “Bon antó, mi ta aliviá. E promé tanda a bai mihó ku aña pasá.” Lydia Emerencia, direktor general interino di e skol tambe ta bisa ku e ta ‘hopi satisfecho’.
Despues di partimentu di diploma Michelle ta bai Hulanda. “Mi ta bai hasi lerarenopleiding ingles.” Aygeron ta sali pa Merka ora e slag. Dia 29 di yüni lo tende e resultado ofishal di èksamen.
Outor Janita Monna