Stan Elhage di Elhage Arms
WILLEMSTAD – Un konsekuenshanan dje ola di kriminalidat na Kòrsou i tambe e preokupashon i intrankilidat ku esaki ta okashona, ta ku hopi komersiante ta deseá pa legalmente karga arma. Esaki pa nan seguridat i defensa di propiedatnan. Remarkabel ta ku no ta solamente hende homber ta mustra interes pero tambe komersiantenan muhe. Por konstatá e deseo aki serka prinsipalmente e grupo di komersiante chines.
Resientemente minister di hustisia Nelson Navarro a anunisiá ku ta amplia posibilidat pa komersiantenan ku ta kore risiko grandi di bira viktima di atrako ku violensha, aplika pa permit pa legalmente karga. Ultimo tempu prinsipalmente e chinesnan regularmente ta bira viktima di atrako ku violensa . Entretantu Korsou a registra varios kaso di atrako ku morto serka prinsipalmente e grupo di komersiante chines.
Elhage Arms, ta speshalisa den entre otro duna kurso di tiramentu i prepara e hendenan ku ta den proseso pa haňa un permit pa karga arma. Gobièrnu ta e uniko instansha ku por duna permit pa karga arma.
Ademas di duna e kursonan di tira Elhage Arms ta konseha e komersiantenan kon pa reakshona den entre otro kasonan di atrako. E hecho ku un persona tin su arma legal, no ta nifika ku mesora ku e ta den un situashon di urgensha e mester use. “E situashon mester hustifika uso di e arma”, asina Stan Elhage a enfatisá.
Ademas un persona ku tin permit pa karga arma tin tambe hopi responsabilidat. “Ora bo tin un arma bo no por kana broma ku e arma, pasobra nan por ataka bo, kita e arma for di bo”, Stan Elhage a sigi splika.
Outor Dulce Koopman