Mitch Henriquez
DEN HAAG – Polis ta direktamente responsabel pa morto di Michel ‘Mitch’ Henriquez (42), famianan di e defuntu ta haña. Polis a detené e arubano violentemente durante un festival di muzik na Den Haag i el a muri den wikènt.
Potrèt ku a saka den hòspital djis promé ku el a fayesé ta mustra Henriquez ku su kara mal batí. No ta kla ainda pakiko polis no a duna asistensia médiko ora Henriquez a pèrdè konosementu durante di su detenshon. Rijksrecherche a tuma e kaso ofer i ta yama testigu pa drenta den kontakto ku nan i pa manda imágen. Hustisia a duna òrdu pa hasi outopsia.
Segun un testigu un polis a aserk’é pasobra e tabata hasi wega i bisa ku e tin un arma den su poseshon. Segun OM ta sigur ku e arubano no tabatin un arma.
“Un grupo di un dies polis ku tabata para mas leu a kere ku Mitch tabata resistí e polis ku a aserk’é i nan a kore bai seka dje”, Yvonne Tromp, ku te na último a keda serka Henriquez a bisa.. “A batié ku klòp den su garganta i riba su pianan, mientras ku otro agentenan di polis tabata ten’é abou na suela, kaminda un polis tabata usa su rudia pa primi Mitch den su garganta.” Otro testigu ta konfirmá e relato aki.
E imágennan di vidio riba social media ta sugerí ku Henriquez a pèrdè konosementu for di ora di su detenshon. Na promé instansha OM djadumingu a laga sa ku Mitch Henriquez a kuminsá sinti malu na kaminda pa warda di polis. OM a troka palabra di e deklarashon aki. Polisnan a kontrolá su pòls promé ku nan a bai kuné den un bùs di polis, pero nan no a dun’é asistensia médiko.
Preshon polítiko
For di polítiko tin preshon riba Hustisia pa krea klaridat tokante e kaso: Alfonso Boekhoudt ku ta representá gobièrnu arubano na Den Haag a tuma kontakto ku Rijksrecherche i for di Aruba a manda un karta pa entre otro miembronan di Tweede Kamer. Promé minister Mike Eman awe meinta a papia ku minister Ronald Plasterk (Relashonnan den Reino), i esaki a primintí e prome minister arubano ku lo bini un investigashon profundo. E alkalde di Den Haag Jozias van Aartsen entretantu a tuma kontakto un miembro di famia pa un kombersashon personal.
Protesta
Den social media a reakshoná ku hopi inkredulidat riba e aktitut ku tantu forsa di polis. Segun algun hende riba Facebook e kaso ta pone nan kòrda e siudat merikano Ferguson i e kaso di Rishi Chandrakasingh di 17 aña ku a fayesé pa motibu di violensia di polis. Na Aruba lo hasi un misa pa konmemorá Henriquez i na Den Haag a planeá un manifestashon. E famianan mes ta kontra di esaki, un subrina ta laga sa.
Segun amigu i famia Michel Henriquez tabata masha kontentu pa ta na Hulanda atrobe. El a bini Hulanda pa mira su tres yunan i e tabata spera di por haña un trabou pa por keda kria su yunan.
Sin komentario
Tantu polis di Den Haag komo Rijksrecherche ta ninga di duna komentario. Famianan ta prekupá pa e kousa di morto. “Nos lo tuma un abogado. E deklarashon di OM ta apsurdo i e no ta bèrdat”, ruman Germaine ta bisa. “Si no ta pasobra hende a filma e insidente polis por a keda mantené ku ta te ora ku nan tabata na kaminda kaba Mitch a bira malu i e ora ei e kaso aki lo no a haña atenshon di media tampoko.”
Outor John Samson