Gezaghebber Lydia Emerencia
KRALENDIJK – Gezaghebber Lydia Emerencia a konkluí ku tin hopi kos di hasi ainda pa Boneiru bira íntegro. E seminario Dia di Integridat ta un ‘gran paso den bon direkshon’.
E seminario akí ta un di Emerencia su proyektonan di mas grandi promé ku e baha komo gezaghebber.
Belkis Osepa ta papia ku Lydia Emerencia
Ademas di Emerencia, Herbert Diaz, koordinadó di investigashon na Universidat di Aruba i e abogado Frank Kunneman tabata presente komo oradó invitá. Funshonarionan ehekutivo na nivel tantu lokal komo di Reino i direktornan di sektor semipúbliko i di empresa di gobièrnu a duna nan ‘input’ tokante maneho di integridat durante e interkambio ku e panelistanan.
Konfiansa
Emerencia tin basta tempu ta traha riba un maneho integral di integridat ku poko poko pero sigur lo mester ser implementá den tur organisashon di gobièrnu. Segun Emerencia: “Tur organisashon ku funshon públiko, i empresa di gobièrnu sigur tambe, mester ta íntegro sin mas. E seminario akí ta kontribuí na krea un kuadro ku lo yuda nos determiná kiko nos tin di traha ariba, kon nos tin ku hasié i pakiko nos ta traha pa mehorá integridat. Pueblo mester por tin konfiansa den gobièrnu, den e gobernantenan i den e organisashonnan ku t’ei pa traha na su fabor.”
Emerencia ta rekonosé ku e funshon di gezaghebber mes tambe ta mashá vulnerabel. E ta haña ku mester enfoká riba e funshon di gezaghebber, i no riba e persona, na un manera ophetivo, profeshonal i ku kabes friu. ‘Gezaghebber tin di aber ku un kantidat di akshon vulnerabel pa korupshon i e ta traha den un ambiente yen di tur tipo di faktor ku por oumentá e vulnerabilidat ei, manera ‘vriendjespolitiek’, nombramentu polítiko, represaya i miedu. Gezaghebber su trabou ta di garantisá ku tur e akshonnan vulnerabel ei den su trabou ta tuma lugá korektamente.’
Bon ehèmpel
Abogado Frank Kunneman a enfatisá ku Dia di Integridat ta djis un promé paso. ‘Tur hende ta interkambiá ku otro riba kiko mester komprondé bou di integridat i kiko por hasi pa hisa e nivel di integridat. Esnan den posishon mas haltu den un organisashon mester ta ehèmpel. Kada ken tin ku wak kiko e mes por hasi pa su organisashon i pa su pais. I si nos sera kabes i kuminsá hasi esei, den poko tempu hopi kos por drecha.’
Herbert Diaz, kordinador investigativo di Universidat di Aruba, a trese dilanti den su disertashon ku speshal den komunidatnan chikí ta nesesario dediká atenshon speshal na desaroyonan ekonómiko. “Mester bin desaroyonan ekonómiko ku ta pèrmití e indivíduo gana su pan di manera desente. Mester forma e ser humano pa e defendé su mes di un manera profeshonal. Hende ta desaroyá i biba positivamente ora krea posiblidatnan ekonómiko pa nan.”
El a enfoká riba e echo ku integridat den komunidatnan chikí tin hopi di aber ku demasiado eskases ku ta hunga un ròl. “Si tin demasiado eskases e ta difísil pa hende den un sosiedat biba di un manera desente. Mi ta papia di eskases di plaka, di kuminda i di trabou. E ta algu importante di nos bida.”
E oyentenan a keda satisfecho ku e promé Dia di Integridat. Den nan diskursonan, e panelistanan di diferente organisashon i instansia gubernamental a splika i duna ehèmpel pa mustra kon vulnerabel nan organisashon por ta, pa loke ta integridat. Na final, Emerencia a aploudí sinseridat di e panelistanan.
Outor Belkis Osepa