Mester a para konstrukshon di un sala di deporte pa motibu di un diskushon entre gobièrnu i SDK – potrèt: Elisa Koek
WILLEMSTAD – Ta basta tempu Bándabou ta malkontentu, Selfrin ‘Fanny’ Sambo ta bisa. E ta presidente di Fundashon Vishon Bándabou (VIBA). Dos aña pasá a lanta e fundashon despues ku un fultbolista a fayesé di un atak’e kurason riba vèlt. “Ta te despues di dos ora numa ambulans a yega.”
Tayer na kandela i spanduk siman pasá un ratu a kousa rebelion na Kaminda di Westpunt. Habitantenan di Bándabou a ekspresá nan malkontentu: “Nos ta paga belasten, ma nos no ta haña nada bèk.”
Un reportahe di Elisa Koek
Sambo a lanta na Barber i e tin su mes barberia. Tirso Patroudis ku ta biba na Westpunt ta traha den konstrukshon i sa hür kas ku turista. “Pa e turistanan tambe ta un problema ku nan no ta haña yudansa”, Patroudis ta konta. “Na Westpunt un turista a muri despues di sambuyá pasobra e no a haña yudansa na tempu.”
Siudadano di segunda kategoria
Problema pa e habitantenan di Bandabou ta entre otro e falta di brantwer, ambulans, oportunidat pa deporte, skol i un biblioteka. “Pero tin mas kos”, Sambo ta bisa. “Yen di fasilidat ta disparse kaminda nos mester paga belasten normal meskos ku tur hende. Ma nos no ta haña nada bèk.”
E habitantenan di Bándabou ta sinti nan mes siudadano di segunda kategoria i ta sinti ku hopi be ta lubidá riba nan. Nan ta interesante solamente djis promé ku elekshon. “E ora ei e polítikonan ta bini aki i ta organisá fiesta. Despues nan ta lubida atrobe ta unda e kaminda di bai Bándabou ta keda.”
Outor Elisa Koek