Trùk di awa mester kore bai bini diferente bia pa trese sufisiente awa pa un kas – potrèt: Hazel Durand
THE BOTTOM – No ta solamente e habitantenan di Saba ku tin hopi molèster di e sekura kontínuo, kompanianan tambe ta sinti e konsekuenshanan finansiero. Pueblo di Saba ta dependé di baki di awa pa nan awa di kranchi.
Trùk di awa ta kobra entre 105 i 110 dòler pa mil liter di awa. E awa ta kosta 60 dòler i sobrá ta pa e entrega i ta dependé di e distansha. Mester di tres te kuater entrega pa duna un kas un suministro di un luna i mei di awa desaliná. Hotèlnan mester di un kantidat mas grandi di awa i mester bestèl mas frekuente.
Asina tambe Social Workplace Organoponics Garden na The Level ta hañ’é konfrontá ku reto. “Mas o ménos dos inch di awa den e baki di awa ta nesesario pa dia pa tur mata i pa e lugá. Esaki simpelmente ta muchu karu. Último lunanan nos a fókùs solamente riba produkshon pa asina nos por keda suministra bèrdura i fruta ku a krese lokalmente den e sekura aki”, La-Toya Charles, direktor di Saba Reach Foundation (SRF) ta bisa.
Hotelnan mester bestèl hopi awa pa siman “Nos ta pidi diessinku entrega di awa pa siman. Na mart esaki tabata asta 20 pa 25 entrega pa siman. Ta nos gastu di mas grandi. Ora e okupashon t’abou ta difísil pa nos traha ku ganashi. Asta ora bo tin un temporada bon mayoria di e ganashi ta bai na awa”, Claire Verbeke-Nuyens, doño di The Queens Garden Resort, e hotel di mas grandi na Saba, ta bisa.
Gastu di entrega
Patrick Hassel, doño di e úniko carwash di e isla, Patrick’s Auto Detailing, tres te kuater bia pa luna ta kumpra awa shinishi (awa un tiki sushi). E prijs di awa shinishi ta 50 pa110 dòler pa entrega. Ta kosta 35 dòler pa laba un outo djaden i djafó. Den e preis aki tin e gastunan di awa tambe. “Probablemente mi mester bai subi e preis”, Hassel ta bisa. E ta haña ku e preis di entrega ta muchu haltu. Sea e preis di awa òf e preis di entrega mester baha”, e ta haña.
Verbeke-Nuyens ta bisa ku ounke ku e gastunan ta haltu, e ta komprondé si. “Tur hende mester gana sèn. Ora awa kuminsá kai nan no tin trabou mas. E mucha hòmbernan ta hasi mas ku nan tin nodi di hasi, nan lista di espera ta largu, pero ami ta haña loke mi tin mester.”
Ku kasi un aña sin temporada di áwaseru den pronostikashon, Verbeke-Nuyens ta haña ku a bira tempu pa Eilandsraad intervení. “Mi ta haña ku mester supsidiá awa i ku mester bini un fábrika di awa. Mi sa ku nan no por sòru pa tin un ret di awa di pipa pa tur kas riba e isla, pero awa ta un di nos promé nesesidatnan di bida.
Hassel ta di akuerdo ku esaki. “Mi ta pensa ku Eilandsraad mester invertí den lantamentu di sistema di awa pa kompanianan.” Segun e, e kantidat di baki di awa shinishi ta limitá, i nan ta dependé espesialmente di desagwe di awa di yobe. Hassell ke resiklá e awa ku e ta usa. Su carwash ta funshoná riba tres tanki di awa grandi.
Manager di Organoponics Garden Leanne Ortiz – potrèt: Hazel Durand
“Pa usa ménos awa nos ta duna e simianan i matanan chikí e mayoria di e awa”, manager di Organoponics Garden Leanne Ortiz ta bisa. “E matanan grandi por keda krese ku ménos awa. Nos a skohe stratégikamente pa planta mata ku mester di ménos awa. E sekura ta un problema tambe pa otro kampesinonan ku kende nos ta koperá pa e marche di kampesino tur siman. Nos tur ta determiná pa keda ofresé produkto fresku, maske tin sekura.”
Outor Hazel Durand