Un trùk ta parti awa na Saba
DEN HAAG- Ministerio di infrastruktura i medio ambiente ta laga sa ku mester solushoná e problema di awa di bebe na Saba strukturalmente meimei di aña 2016. Anteriormente tabatin problema ora ku e sekura a pone ku sabanonan mester a usa baki di awa.
Mayoria bia nan ta paga mas ku 100 dòler pa entrega. Komersio lokal tambe ta sufri di e preisnan haltu di awa.
Pregunta den Tweede Kamer
Segun e miembro di Tweede Kamer Ronald van Raak (SP) na 2009 i 2013 ora ku e isla tabatin e mésun problemanan no a ofresé un solushon struktural. Segun Yvonne Doornduyn, bosero di Ministerio di Infrastruktura i Medio Ambiente, e ministerio na 2013 a pone plaka disponibel pa krea un solushon struktural pa e problemasia sabano di awa di bebe.
E unit di awa di bebe na Saba
Parti di e plan ta di konstruí kapasidat èkstra pa warda awa na e unitnan di awa di bebe, ku ta kambia awa di laman den awa di bebe pa medio di osmósis inverso. Den futuro e unitnan mester produsí delantá ora un tempordo di sekura ta aserkando. Aktualmente e unitnan no por esaki ainda. E partidonan relashoná huntu ku e doñonan ta buska pa sa ta ken mester manehá e awa di bebe i ken tin e responsabilidat final pa e kalidat di e awa.
Awa shinishi
Mester warda awa ku no ta bon pa bebe, e asina yamá awa shinishi. Ta pesei ta traha un sisterna grandi públiko, i un kaminda pa yeg’é. Por usa awa shinshi por ehèmpel pa tualèt i den agrikultura.
Doorduyn: “E plan a kuminsá aña pasá ku kompra di tereno i proseduranan espasial pa konstruí e kaminda i e sisterna. E plaka ta riba e kuenta di Saba i den kada fase nan ta pidi aprobashon pa e ehekushon. Pronto lo kuminsá ku e konstrukshon mes. Na 2016 e ta kla, si tur kos bai bon nèt promé ku e próksimo sekura.”
Filter chikí di awa
Banda di esaki Saba ta investigá filter chikí di awa pa e rembaknan privá di e kasnan mes, pa asina purifiká e awa pa propio uso. Ku un filter chikí por garantisá un kalidat rasonabel, segun e ministerio.
E filter mester ta práktiko den su instalashon i su mantenshon. Doorduyn: “Pronto ministerio ta deliberá ku Saba tokante e resultadonan di e investigashon i nos lo skohe e filter deseá. Despues ta djis kumpra i instalá. T a di spera ku esaki tambe ta kla den zomer di otro aña.”
Ta muchu karu i kompliká pa instalá un ret di pipa di awa na Saba pa motibu di e tereno di baranka. Ademas hopi sabano no por paga e tarifa básiko mensual pa konektá ku e ret di awa.
Pieter Hofmann