Otro siman ora skol kuminsá atrobe e akohida di mucha despues di skol lo keda bashi – potrèt: Janita Monna
KRALENDIJK – Otro siman skol ta habri atrobe na Boneiru. Pero no ta kla si lo tin akohida di mucha di skol básiko despues di skol. Pasobra Fesbo, e fundashon ku ta regla akohida di mucha di skol básiko, den su sifranan anual no por a hustifiká 200 mil dòler. Pa e motibu aki gobièrnu a terminá e kòntrakt di kuido ku nan tabatin.
“Si, e kibramentu di e kòntrakt ta yega na un mal momento”, e diputado responsabel Benito Dirksz ta rekonosé. “Ma kua momento sí ta kumbiní?”
Mal maneho
Dirksz ta enfatisá ku gobièrnu no por a hasi nada otro. Fesbo tabata risibí 800 mil dòler di supsidio pa aña. For di e dokumentonan anual a bin sali ku no por a responsabilisá un gran parti di e gastunan, un 200 mil dòler. Klaramente aki ta trata di mal maneho. Nos mester a intervení ku forsa komo gobièrnu.”
Fesbo entre otro lo no a paga primanan sosial. Dirkz no por bisa si a kometé aktonan kastigabel tambe. E sa si ku dos miembro di direktiva di e fundashon entretantu a duna keho na polis.
Miembro di Eilandsraad Desirée Coffie (MPB) a hasi pregunta tokante e paramentu di repente di e kòntrakt. “Kon por ta ku niun hende no a mira e kos aki bini? Ta niun hende mes no a supervisá Fesbo último añanan?”
Tra’i Mèrdia, e programa di akohida di mucha despues di skol ku Fesbo tabata manehá, pa motibu di e supsidio di gobièrnu ta grátis. Algun shen alumno di enseñansa primario tabata tuma parti nan e programa.
Grupo vulnerabel
Coffie ta haña hopi yamada di telefon di mayornan prekupá: “Hende ke sa si djaluna tin akohida pa nan yunan. Mayoria bia ta trata di mayornan ku no por paga un akohida privá. Ta un grupo vulnerabel.”
Un trinta alumno asina di Skol Básiko Kolegio San Bernardo ta bai Tra ‘i Mèrdia tur dia. E skol a tende di e paramentu di e kòntrakt ku Fesbo den media. “Nò, mayornan no a yama nos ainda”un trahadó di e skol ta bisa, “pero mi ta ferwagt ku dia skol habri djaluna awor, nos lo haña pregunta si.” E skol no tin un solushon asinasina.
Diputado Dirkz ta sigurá ku ta trahando duru pa pèrkurá ku e muchanan aki no ta sintá nan so na kas despues di skol. “A lanta un ‘tim di krísis pa akohida despues di skol’ i nos tin intenshon di lanta un fundashon nobo, ku mester hiba e maneho di sentronan di bario i pèrkurá pa akohida despues di skol”, segun Dirksz. “Ademas nos ke adaptá e kòntrakt di kuido, pa asina nos tin bista kontínuamente kon e organisashon ta rere.”
Coffie ta duda si riba un término asina kòrtiku ta posibel pa un organisashon nobo tuma e tareanan ofer di Fesbo. “Ta trata di seis sentro di bario, rònt di e isla. No ta fásil pa organisa esaki den tres dia.
Salario
Tambe e tin pregunta tokante e posishon di e mas o ménos trinta trahadónan di Fesbo. Nan no ta traha pa gobièrnu sino pa e fundashon. Dirksz”For di punto di bista sosial nos a reservá un suma pa asina sikiera e trahadónan por risibí nan salario di yüli i ougùstùs.”
Outor Janita Monna