Gobernador Fredis Refunjol – potrèt: KABGA
DEN HAAG – E instrukshon ku Konseho di Minister di Reino a duna gobernador arubano Fredis Refunjol na yüli 2014 tabata ilegal. Esaki por dedusí di un asina yamá ‘informashon’ di Raad van State.
Raad van State, e wes di gobernashon di mas haltu ku Hulanda tin, a skibi un informashon na okashon di e instrukshon ku Konseho di Minister di Reino (RMR) a imponé riba gobernador di Aruba. RMR no tabata ke pa Refunjol aprobá e presupuesto arubano di 2014, un asuntu outónomo di Aruba. Promé minister Mike Eman despues di esaki a tene un wèlga di hamber pa un tempu kòrtiku.
Papel dòbel vulnerabel
Raad van State ta enfatisá ku gobernador mester hunga un papel dòbel vulnerabel. Na Aruba, Kòrsou i Sint Maarten gobernador ta representante di Rei. Den e papel aki gobernador mester vigilá outonomia di e paisnan. “Pero, banda di esaki gobernador alabes ta un organo di Reino, kaminda e ta ehekutá tarea i responsabilidat na nòmber di gobièrnu di Reino”, visepresidente di Raad van State Piet Hein Donner ta skibi.
Raad van State ta haña ku gobernador mes mester husga si loke e ta hasi ta forma parti di su tarea di órgano di pais of di òrgano di Reino, i e ta e persona pa ekselensia pa investigá si balornan importante (derechonan fundamental i libertatnan, seguridat hurídiko i bon gobernashon) ta na peliger i ku pesei eventualmente mester apliká e funshon di garantia. Raad van State ta sugerí ku RMR a hasi mas ku tabata pèrmití ora el a disidí pa gobernador, kiko ta e frontera entre órgano di pais i órgano di Reino. Ku esaki a fòrsa gobernador den un posishon intolerabel.
Areglo di disputa
Segun Raad van State, Aruba no por a skohe nada otro ku aseptá e desishon. E úniko prosedura posibel ta pa kontinuá e deliberashonnan den Konseho di Minister di Reino, pero ei Hulanda tin un mayoria desisivo. “Ta manera no tin mas posibilidat, miéntras no tin un areglo adekuá pa disputa a base di e posibilidatnan ku Statüt ta ofresé”, Raad van State ta konkluí e informashon.
Outor Pieter Hofmann