Iona Schmidt no por akudí niun otro kaminda ku no ta den e kas di kuido – potrèt: Elisa Koek
ORANJESTAD – “Mi no ker a bai ora m’a tende ku mi mester a bai e kas di kuido. Mi no por a aseptá. “Iona Schmidt tin 44 aña i e ta paralisá for di su sintura te abou. Ya e tin sinku aña ta biba den e Auxiliary Home, e kas di kuido pa ansiano na Sint Eustatius.
Na Sint Eustatius no tin akohida òf fasilidat pa hende ku un hèndikèp. Mucha ku nase ku un hèndikèp ta bai biba Hulanda òf ta haña akohida serka nan mayornan mes largu ku ta posibel. Ora esaki no por mas e úniko opshon ku a keda ta Auxiliary Home.
Ta meinta anto muzik ta toka duru den e plenchi di e kas di akohida. Algun ansiano ta zoya riba ritmo di e muzik i otronan ta lesa korant òf ta hasi obra di man. Schmidt tin un paña di bòrda su dilanti pero e no por konsentrá “Mi ta purba bòrda un tiki pa mi no fèrfela mi mes, pero esaki no ta logra tur ora. Mi ta sinti manera tur kos ta inútil. Schmidt ta e úniko habitante hóben. Tin be e ta purba kombersá ku e otro habitantenan pero esaki ta pone’ realisá hopi kos. “Nan no ta komprondé mi, nan ta demènt òf okupá ku henteramente otro kos. E hendenan aki ta hopi mas bieu ku mi. Mi no ta pèrtenesé aki.
Previshon
Schmidt tin famia na Statia ku tin be ta sali keiru kuné. E kas mes tambe ta organisá ekskurshon. “Esei si mi ta gosa di dje, pa mi sali fo’i djaki un ratu, e ta hari. Auxiliary Home tin un bùs spesial pa hiba e habitantenan. Ku no ta pa e bùs aki Schmidt lo no por bai niun kaminda. “Kasi niun kaminda na Sint Eustatius no ta aksesibel pa hende ku un hèndikèp. E bùsnan normal mes niun ora so.” Si Schmidt tabatin e posibilidat lo e ker a bai Hulanda, òf biba riba su mes den un kas adaptá. Ma e no ta kere esaki lo por sosodé. “Mi no tin nada na Hulanda i mester regla masha hopi kos. Mi no por traha tampoko ke men ta kon mi por logra algu asina.”
Depreshon i tristesa
Rennata Mercurius, direktor di Auxiliary Home ta saka un suspiro grandi ora e papia di Schmidt. “Mi tin duele di dje. Un hende di kuarenta aña ta pará mei mei den bida. Nos aktividatnan ta pa ansiano i no pa habitante manera Iona.” Kasi nunka Auxiliary Home no ta tuma hende ku un hèndikèp. Mayoria di nan ta bai mas lihé posibel. “Si nan no bai ta nos ta e úniko opshon. Tin un akohida mas, ku ta organisá aktividat den dia, pa ansiano tambe, pero Auxiliary Home ta e úniko ku ta kuida tambe.”
Segun Mercurius e situashon ta sin perspektiva. No tin un grupo ku ta sali na interes di hende ku un hèndikèp, pa biba añanan largu meimei di hende ku ta bai atras so ta eksihí hopi. “Iona ta mira hende rònt di dje ku ta bai atras ketu bai i e ta perdè hopi amigu i amiga, bida no mester t’asina na e edat ei. Esei ta trese depreshon i tristesa i na final ta influenshá su salú tambe. Lastimamente no tin otro opshon pa Iona.”
Nos no ta hulandes
Schmidt mas o ménos a konformá. E sa ku e no tin otro eskoho. “Lo mi keda akiden sobrá di mi bida, no tin nada otro. Mi ta asombrá si algu asina ta posibel den Reino pero aparentemente nos no ta hulandes.
Outor Elisa Koek