Ret Karibense ta trese un seri di artíkulo tokante e islanan di Hulanda Karibense, sinku aña despues di e renobashon estatal di 10 di òktober 2010. Riba e fecha ei a desmantelá Antia Hulandes i Sint Maarten i Kòrsou a bira pais outónomo den reino. For di e dia ei Boneiru, Sint Eustatius i Saba ta ‘munisipio ekstraordinario’ di Hulanda. Aruba tin e státùs outónomo for di 1986 i no tabata forma parti mas di Antia Hulandes.
Remco Tevreden dilanti su makèt di Stadion Nashonal di Peking, mihó konosí komo e ‘Nèshi di Para’ (Weganan Olímpiko di 2008)– potrèt: Dick Drayer
WILLEMSTAD – Desmantelashon di Antia i e nasementu di e paisnan nobo outónomo Kòrsou i Sint Maarten a kaba ku deporte na e nivel di mas haltu ku tin einan. Asina èks direktor di NAOC Remco Tevreden ta bisa. Thakaidzwa Doran di e fundashon di deporte di gobièrnu FDDK tambe ta bisa esaki. Tur dos ta haña ku ta Kòrsou i Sint Maarten nan mes falta.
Di 2002 te 2012 Tevreden tabata direktor di Komité Olímpiko di Antia Hulandes (NAOC). Asina e tabata envolví den e transformashon ku NAOC mester a pasa aden despues di desmantelashon di Antia. Doran ta direktor di e fundashon di deporte di gobièrnu FDDK. E ta envolví den desaroyo di deporte na base i via su propio proyektonan den desaroyo di deporte na e nivel di mas haltu.
“NAOC tabata un órgano deportivo sentralisadó i rekonosé ku aliansanan rònt mundu”, Doran ta bisa. “Via e Komité Olímpiko Nashonal ei tabata pidi i kanalisá beka deportivo i tabatin garantia di entrada na eventonan deportivo internashonal. NAOC promé ku 10-10-’10 tabata hunga un papel krusial den desaroyo di deporte na e nivel di mas haltu riba tur e islanan.”
“Komité Internashonal Olímpiko (IOC) den e añanan promé ku e desmantelashon a indiká ku e no ta bai atmití komiténan nashonal di paisnan ku no ta independiente. Esaki a palabrá for di 1996.” Segun e direktor di NAOC di e tempu ei Remco Tevreden nan ker a sigui si ku e variante antiano eksistente.
Kondishonnan impresindibel
“Tene e kos huntu serka otro, nan a bisa nos. Laga polítika krea e kondishonnan impresindibel ei, pa por keda un moveshon olímpiko konhunto”, Tevreden ta bisa. Un tempu tabata parse manera esaki lo bai bon, riba un konferensha den Plaza hotel polítika di e tempu ei i mundu deportivo tabata riba un liña. “Pero ku yegada di un gobièrnu nobo (Schotte, red.) esaki a kaba masha lihé.”
“Kòrsou mester mester a haña un propio representashon olímpiko”, Tevreden ta bisa. “IOC a bisa nos: ‘make no waves’, pero e bientu nobo ku tabata pasa den deporte i polítika tabatin su propio agènda i a konvensé komunidat ku Kòrsou lo a regla esaki via kasonan den korte.”
Eskoho
Na e Weganan na Londen ainda e deportistanan di nivel haltu por a sali bou di bandera olímpiko, pero despues nan mester a skohe; sali pa Hulanda òf pa Aruba. “E deportistanan di un nivel berdaderamente haltu a tuma nan desishon masha lihé, pero pa e talentonan ku tabata kuminsando esaki a nifiká fin di nan karera den deporto di nivel haltu. “A ménos ku Hulanda ke invertí den bo”, Doran ta bisa.
“Sin akseso na un Komité Olímpiko bo no tin akseso tampoko na Weganan Sentral Amerikano i Karibense, Weganan Suramerikano, Weganan Panamerikano i Weganan Olímpiko Hubenil”, Tevreden ta bisa. E talentonan deportivo di Kòrsou den un tiru a pèrdè tur podio kaminda nan por a midi nan mes ku sobra di e region i di mundu. Manager deportivo ignorante i polítiko inkompetente a bai mete den un trayekto ku nos komo NAOC a invertí den dje ku hopi presishon.”
Algun bònt deportivo a logra ainda via federashonnan internashonal di djòin mundu deportivo federal òf mundial. Asina CONCACAF i bònt mundial di futbòl FIFA a disidí di duna bònt nashonal di futbòl FFK akseso na su torneonan. Hungadó di vòli i beisbòl tambe por kompetí riba nivel mundial.
E kasonan den korte na Genève segun manager di atletismo Rudsel Martina, miembro di Federashon Deporte i Olímpiko Kòrsou (FDOK), susesor di Federashon Kurasoleño di Deporte, ainda ta koriendo. Na yanüari 2016 lo tin notisia nobo di esaki atrobe. “Probablemente deportistanan por djòin atrobe riba nivel regional, pero solamente si Kòrsou bai di akuerdo ku nan no tin derecho di vota den e komishonnan ei. Un situashon ku e bòntnan di deporte no tin niun tiki gana di dje”, segun Martina.
Víktima
Pesei ni Tevreden ni Doran no ta mira un solushon riba término kòrtiku. “Sinku aña despues ainda nos no a haña rekonosementu olímpiko, nos ta i ta keda plamá. FDOK tampoko no por uni e partidonan.”Tevreden ta añadí: “E chèns ta kasi nada ku nos komo pais outónomo den Reino por start un komité nashonal. Nos deportistanan di nivel haltu ta e víktimanan di esaki,”
Outor Dick Drayer