Ret Karibense ta trese un seri di artíkulo tokante e islanan di Hulanda karibense, sinku aña despues di e renobashon estatal di 10 di òktober 2010. Riba e fecha ei a desmantelá Antia Hulandes i Sint Maarten i Kòrsou a bira pais outónomo den reino. For di e dia ei Boneiru, Sint Eustatius i Saba ta ‘munisipio ekstraordinario’ di Hulanda. Aruba tin e státùs outónomo for di 1986 i no tabata forma parti mas di Antia Hulandes.
Statia ker a keda serka Antia, pero pasobra esaki no tabata un opshon, nan mester a bira munisipio di Hulanda – potrèt: Elisa Koek
ORANJESTAD – “Ta kuido médiko so a bira mas mihó”, Lynette Anson di Brighter Path Foundation ta kontestá ora puntr’é kiko a kambia na Statia for di tempu di e renobashonnan estatal riba 10 di òktober 2010. Banda di esaki, segun e, kos ta tristu na Statia. “Mi no ta optimista pa e laso entre Hulanda i Statia. Un matrimonio ku solamente un aspekto positivo no ta traha.”
Dion Humphreys, direktor di Mega D Youth Foundation (MYF) por menta un punto positivo. Pasobra for di 2010 e fundashon di hubentut ta risibí supsidio di Hulanda. “Nos tin mas sosten, un ret mas grandi i espasio pa hasi nos trabou. Pa hubentut e kambio tabata positivo.”
Ora a desmantelá Antia anterior sinku aña pasá e islanan a haña tres opshon: independensha, un státùs outónomo òf forma parti di Hulanda komo munisipio ekstraordinario. Pueblo ker a keda forma parti di Antia pero komo ku esaki no tabata un opshon Statia a bira munisipio di Hulanda.
Sin pensa
Segun Anson for di e tempu ei Statia a bai atras so. E echo ku for di kuminsamentu di sèptèmber ofisialmente Hulanda ta boikoteá Statia, segun e no ta hasi masha diferensia. “Apénas Hulanda sa unda Statia ta keda, ta Boneiru so nan konosé pasobra ta ei e Representante di Reino ta keda.”
Espesialmente e gastunan haltu di impuesto ta kaba ku e poblashon, Anson ta bisa. “Niun hende no sa kuantu Hulanda ta haña i kiko ta sosodé ku e plaka.” E sistema ta inefisiente tambe, pasobra a kopi’é direktamente for di Hulanda. No a tene kuenta ku e kultura, lokashon òf otro diferensha ku Hulanda. “Pa paga impuesto riba gastu di kalifakshon aki ta ridíkulo. No a pensa riba e kosnan aki i asina ta gasta masha tantu plaka.”
Hubentut
Pa hubentur ta manera e último sinku añanan tabata mas positivo. Den enseñansa ta traha masha duru pa promé ku ougùstùs 2016 kumpli ku e eksigenshanan hulandes di enseñansa i e previshonnan pa hóben tambe ta haña sosten. Dion Humphreys a kuminsá ku MYF na 2010 ora el a kaba di yega bèk na Statia. “No tabatin nada di hasi pa hubentut. Mi ker a kita nan for di riba kaya i trese nan den un ambiente seif.”
Humphreys a kuminsá ku algun boluntario i porfin a haña supsidio di Hulanda. Awor despues di sinku aña, e por mira bèk ku satiskakshon. “Bo ta ripará na e muchanan: nan ta entusiasmá i nan ta bini e fundashon di nan propio boluntat. Sin Hulanda mi no tin un idea ta kon nos lo tabata pará aworakí.”
Hendenan di edat avansá
Pa esnan di edat mas avansá e situashon ta ménos positivo. Aki tambe ta manera a kopia e sistema Hulandes direktamente riba Statia: por ehèmpel a ekonomisá riba e pakete di seguro meskos ku na Hulanda. “Mi ta komprondé ku mester a saka kos for di e pakete, pero e diferensha ta ku nos hendenan grandi mester biba di un penshun chikí di 600 doler pa luna”, e direktor di e Auxiliary Home Renara Mercurius ta bisa. Awor e hendenan grandi di edat ku e penshun aki nan mes mester paga gastunan di fisioterapia òf dentista. Ta nèt nan tin mester di esaki frekuentemente. “E grandinan ta pasa trabou anto hopi be no ta mira un solushon.”
Nashonnan Uní
Un delegashon di kuater persona na ougùstùs a bai Nashonnan Uní pa presentá e situashon ‘insoportabel’entre Hulanda i Statia. E delegashon ta boga pa mas libertat pa nan mes maneha e pais i pone regla. “Por lo pronto nos ta mek riba Nashonnan Uní pasobra serka nos propio gobièrnu nos no ta bini kla”, Anson di Brighter Path ta kontinuá. “E ritmo hulandes no ta funshoná aki, nos tin nos mes baile.”
Outor Elisa Koek