Ret Karibense ta trese un seri di artíkulo tokante e islanan di Hulanda karibense, sinku aña despues di e renobashon estatal di 10 di òktober 2010. Riba e fecha ei a desmantelá Antia Hulandes i Sint Maarten i Kòrsou a bira pais outónomo den reino. For di e dia ei Boneiru, Sint Eustatius i Saba ta ‘munisipio ekstraordinario’ di Hulanda. Aruba tin e státùs outónomo for di 1986 i no tabata forma parti mas di Antia Hulandes.
For di 10-10-10 hopi kos a drecha na Saba su infrastruktura – potrèt: Hazel Durand
THE BOTTOM – Despues di sinku ana komo munisipio ekstraordinario Saba ta mira progreso, manera e mehorashon di infrastruktura i bista riba un ret di awa di pipa, pero asuntunan manera penshun, kosto di bida i preshon di belasten ta keda tehi hende.
Saba United People Labor Union Association (SUPLUA) i gobièrnu insular na luna di mei a forma un komishon pa investigá e struktura nobo di salario, ku a introdusí na oktober 2014. Amtenarnan ta prekupá kon e struktura nobo di salario lo influensha nan rentabilidat, tantu pa término largu ku pa término kòrtiku.
Segun Ludwina Charles, direktor di SUPLUA, gobièrnu insular no a reakshoná ainda. Sueldo mínimo na Saba ta 5.09 dòler. Ademas e penshonadonan ta frustrá ku nan penshun ku ta bou di e márgen di pobresa. “Mi penshun ta 800 dòler. Kon mi ta hasi paga mi resibunan ku esaki”, Thadseus Durand ku a kaba di baha ku penshun ta puntra.
Belasten dòbel
Na yüli konseho insular a trese dilanti na Hulanda e belasten dòbel ku sabanonan ta paga na Saba i Sint Maarten. Derecho internashonal ta prohibí e belasten dòbel, ke men segun gobièrnu insular ta responsabilidat di Ministerio di Finansa pa haña un solushon.
Konseho insular a proponé na Hulanda pa para impuesto di importashon te dia yega na un solushon ku Sint Maarten. Pero minister di Asuntunan Interno i Relashonnan den Reino Ronald Plasterk ta bisa den un karta na Tweede Kamer ku “por tin belasten dòbel solamente si un empresario òf persona privá di Sint Eustatius òf Saba kumpra otro produkto ku no ta kos di promé nesesidat serka un empresario na Sint Maarten ku no ta kleim e dispensashon di eksportashon i te asina leu ku e balor surpasá e dispensashon di biahero di 500 dòler. Si e empresario no kobra e dispensashon serka e kumprado, no ta trata mas di kobramentu (dòbel) di belasten”, Plasterk ta bisa. No ta mustra manera lo bini un solushon di Hulanda.
Infrastruktura
E mehorashonnan infrastruktural na Saba ta opvio. Loke por mira bon ta e mehorashonnan di e kamindanan, e konstrukshon di un lugá di parker nobo i drechamentu di Saba su pueblo mas frekuentá Windwardside, konstrukshon di un instalashon eléktriko nobo i un kompania nobo di resiklamentu i mehorashonnan na e aeropuerto, basá riba reglanan internashonal.
Fin di sèptèmber a aseptá un bùdjèt di 10.576 dòler pa 2016, solamente 156.000 dòler mas ku e bùdjèt pa 2015. Segun gobièrnu insular e añanan ku ta bini lo tin mas atenshon pa koperashon ku gobièrnu hulandes pa sigurá ehekutashon di e programa di Hulanda karibense di mas aña i e plan di desaroyo. Algun proyekto a kuminsá kaba na 2014 i lo kaba na 2015-2019.
Pipa di awa
E proyekto di mas grandi ta instalashon di un sistema di ret di pipa di awa. Fin di e aña aki òf kuminsamentu di otro aña ta kuminsá instalá un pipa di awa di haf, Fort Bay, te na e kapital The Bottom. Pueblo ta haña e preis di awa di bebe muchu haltu i fin di ougùstùs a baha e preis ku dos sèn pa galòn. Gobièrnu insular a introdusí un supsidia di emergensia durante tempu di sekura i pa kas ku entrada abou tin fondo di ayudo spesial.
Enseñansa
Kuminsamentu di aña di skol nobo tabatin bon notisia pa e skol d enseñansa sekundario ora tur alumno di e último klas di Saba Comprehensive School (SCS) a slag pa nan èksamen final. Regularmente e skol tabata haña mal nòmber pasobra e skol tabata lucha ku un skarsedat di dosente i ku problema ku e direktiva di skol. Ta manera enseñansa na Saba ta kore atrobe, loke ta importante pasobra enseñansa na BES na 2016 mester kumpli ku kriterio hulandes.
Outor Hazel Durand