Defensor di Pueblo Reinier van Zutphen ku e rapòrt tokante Kuerpo Públiko Boneiru | Potrèt: Pieter Hofmann
DEN HAAG – “Loke ta hala mi atenshon ta ku siudadanonan mester warda masha largu ora nan tin keho.” Asina Defensor di Pueblo Nashonal, Reinier van Zutphen, ta bisa na okashon di su rapòrt ‘En toen bleef het stil…’ (‘I e ora ei a keda ketu…’trad.), tokante Kuerpo Públiko Boneiru.
“E problemanan ta mas den e manera ku ta anda ku e siudadanonan di Boneiru ku den e reglanan chikí. Mi impreshon a base di kombersashon ku mandatario ta ku nan mes tambe ta haña esaki.”
Na yuli Defensor di Pueblo a start sinku investigashon di Kuerpo Públiko Boneiru (OLB). Bonerianunan tabata keha ku gobièrnu lokal tabata reakshoná slo òf niun ora so riba un keho. Mayoria di e kasonan ta trata di tereno.
Rekomendashon
Van Zutphen su rekomendashon di mas importante den e rapòrt ta ku mester tene siudadanonan mihó na altura, maske kon komplika un petishon por ta. “Si un instansha di gobièrnu ta kere ku nan no por kontestá den dos òf tres siman, nan mester bisa: nos a risibí bo keho òf petishon, nos ta tratando e, e ta den man di tal i tal ámtenar òf departamentu, pa pregunta por akudí tal i tal kaminda. Kaba mester bisa tambe ki ora sí ta bini un kontestá.”
Kuater di kada sinku kaso no a trata ainda. Van Zutphen: “Pa algun keho ainda tin kos kompliká ku mester sosodé. Un desishon di gobièrnu, un kombersashon mas aleu, un trokamentu di tereno. E rapòrt aki a hasi hende hopi konsiente si ku OLB mester hasi algu.”
Tòg Defensor di Pueblo ta krítiko tambe den su rapòrt. Hopi bia e aparato atministrativo ta kuminsá traha te despues ku el a tene un investigashon. Esaki no ta mustra riba mala boluntat? “Esei lo ta un aktitut masha negativo”, Van Zutphen ta haña. “Unda ku mi yega . tur kaminda nan ta di akuerdo ku por mas mihó i mas lihé. Pero pa pone e paso, esei ta mesun difísil pa tur hende tur kaminda.”
Problema finansiero
Djis despues ku a habri e sinku investigashonnan OLB a reakshoná bisando ku e problema ta pa mayoria parti finansiero. Pa motibo di e pago liber abou na Bonairu hopi vakatura na gobièrnu ta keda sin haña hende. “Plaka semper ta un issue. Pero e plaka no ta den esun mail ku bo ta manda un hende pa bisa ku bo a risibí e keho i ku bo ta tum’é serio. Den e solushon final si mi por imaginámi ku plaka ta hunga un papel. Pa usa un kaso di e rapòrt: pa duna un pèrmit di sambuyá no tin masha plaka envolví.”
Defensor di Pueblo mes tambe ta lucha ku falta di plaka. Asina e mester a kanselá un biahe planeá ku investigadó pa Hulanda Karibense. Van Zutphen no tin miedu ku awor e preshon lo baha. “Mi ta ripará sí ku tin algun desapunte pasbra nan a konta ku mi lo a bini.”
Outor Pieter Hofmann