Fiskal Monique Dennaoui-Simon – potrèt: Dick Drayer
WILLEMSTAD – Gobièrnu di Kòrsou for di awe ta nombra luna di novèmber komo e luna kontra violensia den relashon ku e slogan: No Mas, No More. Asina fiskal Monique Dennaoui-Simon ta bisa.
Djaweps komo representante di Ministerio Públiko huntu ku polis i Slachtofferhulp Curaçao (Ayudo di Víktima Kòrsou) e tabata di bishita na Suffisant. Ei a informá esnan interesá di e bario tokante violensia den relashon i kon trata ku esaki.
Hopi
Di e kantidat di sigur 700 delito di violensia ku tur aña ta kometé na Kòrsou, algu mas ku mitar tin di hasi ku violensia den relashon. “Esei ta hopi”, Dennaoui-Simon ta bisa.
Enkuentronan di informashon manera esun aki, ta mustra ku e sifranan por oumentá. “Hopi hende no ta na altura di e posibilidatnan pa sali for di e spiral di violensia den relashon. Un di e maneranan ta pa hasi denunsio na polis, pero víktimanan por hasi uso di ayudo tambe.”
Kultura di macho
Nella Papa ta traha na Slachtofferhulp Curaçao. Diariamente e ta hañ’é ku kasonan di violensia den relashon. “E problema ta ku na Kòrsou tin un kultura di macho. Hopi hòmber ta kere ku nan ta manda i ku hende muhé no por disidí. Pero hende muhé ta birando mas i mas independiente. Nan ta traha i pensa kompletamente diferente di ántes.” Segun Papa violensia den relashon ta pidi un enfoke spesífiko. “Tin be hende no tin niun kaminda di bai i nan ta buska seguridat. Esei ta promé kos ku bo mester ofresé, sino bo no por sigui.”
Ministerio Públiko ta kontentu ku e sosten di gobièrnu pa por duna atenshon spesífiko na violensia den relashon. Dennaoui lo tabatin gana di mira ku ta bini un lugá spesífiko kaminda por mèldu, pa asina for di e lugá ei por atendé mas efisiente ku e ayudo.
Kódigo pa mèldu
Mas importante ainda ta ku lo bini un kódigo pa mèldu. “Ku esaki profeshonalnan por mèldu si nan tin sospecho ku na kliente òf pashènt ta víktima di violensia den relashon. Aktualmente esaki no ta posibel pasobra nan tin e deber di sekresia.”
Outor Dick Drayer