Martha Merenciana dilanti su bùs nobo – potrètnan: Janita Monna
KRALENDIJK – Martha Merenciana ta kontentu. Djaluna komo promé bonerianu el a haña un mikrokrédito. I ku esaki e por laga su soño sali.
Martha Merenciana tin un kompania chikí, ‘Martha’s Transport’. E ta traha komo taksista pa habitantenan di e isla i komo guia turístiko ora ku e barkunan krusero ta den haf. Ku orguyo e ta para banda di su bùs blanku lombrante. E t’asina nobo ku e plèstik ta riba e asientonan ainda. “Blanku ta mi koló preferí”, e ta bisa.
Plaka
Ántes Martha tabata shafùr kaba, te dia ku e mester a stòp poko tempu pa motibunan médiko. E ker a kuminsá traha atrobe, pero ku un bon bùs. “Unu sin dolo di kabes.” Pero pa e kumpra un e tabatin mester di plaka. E no tabatin i e no tabata bini na remarke pa un fiansa na banko.
Pero pa mikrokrédito si. Orphaline Saleh ta konsehero di kompania na nòmber di Qredits, ku ta duna krédito na Boneiru. “Riba e isla tin hopi hende ku ke kuminsá un kompania pero ku no tin kapital propio, of un bòrg ku nan por haña un fiansa na banko kuné.E starternan aki por akudí serka nos. Pero tambe empresario eksistente ku ke invertí den nan kompania por haña un fiansa chikí. Nos ta duna krédito te 25 mil dòler.”
Plan di empresa
Ta drenta hopi petishon, segun Saleh. “Hende por entregá un petishon via un website. Huntu ku e petishon nan mester manda un plan di empresa. Esaki no tin nodi di ta kompliká. Riba e website nos tin shablon di un plan asina.”
E kompania hulandes ku a bai Boneiru a logra huntu gobièrnu lokal i di Reino. “Na e parti di mas abou di dunamentu di krédito ainda no tabatin previshon”, Huub de Bliek di Asuntunan Ekonómiko ta bisa, “tabata e parti ku tabata falta ainda.”
Martha Merenciana ta haña un chèk for di man di diputado Abraham (man robes). Na man drechi Orphaline Saleh
Saleh: “Un banko ke mas seguridat. Nos ta finansá a base di un plan pero nos ta wak e persona tambe. Si nos tin konfiansa, por regla algu lihé. E mikrokréditonan ta yuda Bonerianunan para riba nan mes pia atrobe. Nos no ta duna nan plaka so, pero nos ta ofresé nan e konosementu pa edifiká nan kompania,”diputado Clark Abraham di Asuntunan Ekonómiko ta añadí: “Un inisiativa manera esun aki ta promové empresario lokal i ta fortifiká ekonomia.”
Bùs nobo
Martha a kore e promé karedanan siman pasá kaba. Ku un sonrisa grandi e ta bisa “I tur turista ker a kore den mi bùs nobo.”
Outor Janita Monna