Asiento den Tweede Kamer – potrèt: Risastia
DEN HAAG – Mayornan na Hulanda Karibense tur luna lo haña 38 dòler di plaka pa yu pa kada yu. Un mayoria den Tweede Kamer definitivamente a aseptá e lei ku ta hasi esaki posibel.
D66, SP, PvdA, CU i e frakshon di dos persona DENK a bai di akuerdo ku e proposishon di lei. VVD i PVV a vota kontra, manera a ferwagt. VVD ta haña ku promé mester palabrá un norma promé ku por establesé un suma, PVV segun nan mes palabra ta kontra un ‘barku yen di plaka grátis’.
Purá
Ta e intenshon pa paga e plaka pa yu entrante promé di yanüari, pero mester hasi lihé si. E proposishon di lei ta bai Eerste Kamer, ku mester ratifiká e lei. Segun sekretario di estado Jetta Klijnsma (Asuntunan Sosial i Labor) mester pone personal èkstra traha riba e islanan pa por prosesá e petishonnan ku ta ferwagt di mayornan.
E 38 dòler pa mucha no ta dependé di entrada. Un moshon di Tjitske Siderius (SP) pa laga e haltura di e plaka pa yu dependé di e entrada di e mayornan no a logra.
E plaka pa yu na islanan BES no ta subi segun ku e yu bira mas bieu, algu ku na Hulanda oropeo sí ta sosodé. Un proposishon di Tunahan Kuzu (Denk) pa subi e plaka pa yu segun grupo di edat, no a logra.
Petishon
No ta pidi e plaka pa yu outomátikamente ora inskribí na registro sivil. Siderius a boga p’esaki, pero e moshon aki tambe a rechasá. Riba e website di Rijksdienst tin un formulario pa pidi plaka pa yu. Por buska e formulario tambe na un di e ofisinanan di RCN, SZW, Belastingdienst, Sentro pa Hóben i Famia òf e departamento di asuntunan sivil di Kuerpo Públiko.
Outor Pieter Hofmann