Juliana van Thijs i Franklin Francinet – potrèt: Pieter Hoffman
ZWOLLE – Na añanan ’60 e promé antianonan ta bai Zwolle, mayoria parti pa studia. Despues e situashon ta kambia i e hóbennan antiano ku ta kousa problema ta haña mal nòmber. Munisipio i miembronan di komunidat antiano ta trata di drecha e situashon.
Franklin Francinet na 1965 ta yega Zwolle komo un di e promé antianonan. “M’a komprondé ku e guia na e HTS tabata bon.” E studiantenan antiano na Zwolle ta haña hopi atenshon riba kaya. Francinet: “Apenas tabatin hende di koló. Nos tabata kos di mira.”
Mayoria di e antianonan e tempu ei tabata bini Zwolle pa studiá. “Hende trankil ku tabata haña nan kaminda lihé den komunidat. I nan tabata bini aki ku un meta”, e trahadó soshal Juliana van Thijs ta bisa.
Shell
Ora na 1985 Shell bandoná Kòrsou, hopi famia ta pèrdè nan entrada. Un parti di e grupo ta kore bai Hulanda den purá, un parti di nan ta yega Zwolle. Francinet: “hopi famia no tabata bon prepará pa e bida aki.”
Bo por a haña ‘uitkering’ (un tipo di onderstant) fásil. Es ku no tabatin entrada mas na Kòrsou, tabata mir’é komo un manera pa skapa pobresa”, segun Francinet. Por haña kas di gobièrnu fásil. Mayoria di nan den e bario Holtenbroek.
Problema
Un parti di e nobatonan aki tabatin problema pa adaptá. Desempleo, kitamentu for di skol i sifranan di kriminalidat – espesialmente bou di hóbennan – ta haltu. Molèster riba kaya ta oumentá, hinkamentu i tiramentu no ta un eksepshon.
Hóben antiano problemátiko no ta e únikonan responsabel, pero tantu e komunidat antiano komo munisipio ta preokupá. Huntu nan ta desaroyá un asina yamá ‘antillianenbeleid’ (maneho di antiano) pa redusí e problematika.
E trahadó ku hóben kurasoleño Andy Kirchner un tempu a traha pa proyektonan di munisipio pa hóben. “Ku mi a logra? Nò, E arogansia hulandes i e kuenta ku nan sa tur kos mihó a nèk e hóbennan antiano. No tabata aseptá diferensha, pa loke ta vishon i bùdjèt nan no tabata wak e proyektonan eksitoso. Tabata pone e hóbennan den Holtenbroek, un bario berdaderamente problemátiko. P’esei e proyekto a faya.
Partner den kombersashon
Munisipio ta buska ayudo. Van Thijs i Francinet ta djòin un ‘beraad’ (un konseho) lokal ku a lanta pa kombatí e problematika. Van Thijs: nos a bira un kaminda ku munisipio por a peilu kiko ta kiko.”
Na 2009 ta sigui e órgano di deliberashon di hulandes karibense: Zwocan (Zwols overlegorgaan Caribische Nederlanders) ta sigui e beraad. Zwocan ta sostené esnan ku mester manehá e siudat i e trahadónan den maneho di trato di e problematika. Por ehèmpel e fundashon ta organisá kurso di idioma i kultura pa e trahadónan sosial i polisnan envolví.
Siudadano di segundo kategoria
Banda di esaki Zwocan ta fókùs riba konsientisashon i ‘empowerment’ di antiano lokal. E grupo ku problema no ta duna nada bèk. Francinet: “Nos tabata organisá enkuentronan di informashon, pa asina antianonan por a haña nan kaminda den komunidat. Esaki no tabata popular. Nan tabata ker a sinti nan na kas, – fiesta i dominó. Pero nos ker a evitá ku nan lo a kai atras den komunidat i bira siudadano di segundo kategoria.”
Van Thijs: “E grupo ku ta bai dilanti no tin mester di un fundashon manera Zwocan. Pero e grupo ku mester di un empuhe no ta koperá.
Entená
Bon mirá Francinet no ke papia mes di ‘e komunidat antiano’. E diferenshanan mutuo ta grandi pa loke ta ambishon i estilo di bida. (R)emigrashon tambe ta pone ku henter ora bo ta haña bo ku otro hende ku ta forma parti di e grupo.”
Tòg Van Thijs i Francinet ta desapuntá ku e posishon di antiano na Zwolle. “Nos ta invisibel na Zwolle. Nos ta entená ounke ku nos a lanta den e ambiente hulandes. Nos por hasi mas ku loke nos ta mustra.”
Drive
“Na final ta dependé di e drive”, Francinet ta haña. El a duna un ehèmpel di un señora hóben. “El a topa ku hopi gòlpi di bida, pero el a bini Hulanda i e kièr a logra den bida. Por ehèmpel e tabata tuma lès di hulandes èkstra. Poko tempu pasá el a kaba su estudio.”
Mayan kapítulo dos di un seri di tres parti di Zwolle: “E vibe antiano kasi no t’ei mas na Zwolle.”
Outor Pieter Hofmann