Un ‘grafiti’ na Zwolle ta konmemorá e tempu ku Holtenwijk tabata un bario ku mal fama – potrèt: Pieter Hofmann
ZWOLLE – E bario na Zwolle Holtenbroek ta konosí komo bario di problema. Ku medidanan di seguridat severo e bario ta bai dilanti awendia. Tòg tin krítika tambe riba e aktuashonnan di polis.
Míles di antiano den añanan ’80 ta bai Hulanda, entre otro pa Zwolle. Ei hopi di nan ta haña nan ta biba den e bario Holtenbroek ku sosial-ekonómikamente ta suak kaba.
Pa algun di nan esaki ta kai duru. Relativamente hopi hóben, sin trabou òf edukashon, ta kai den kriminalidat. E antianonan entre nan ta den mayoria.
Holtenbroek ta bai atras i ta hasi bofon di e nòmber yama e lugá ‘Holtenbronx’. Trahadó sosial ku hóben Andy Kirchner: “Tabata un kaminda pa kria kriminal chikí i un lugá pa kriminalnan mas grandi di e siudatnan grandi bin skonde.”
Medida
Polis di bario Ronald Bakker: “Tabatin dos grupo kriminal, un di Kòrsou i un mesklá ku boneriano i yu di Kòrsou. Nan tabata bringa otro pa benta di droga. Esaki tabata resultá den guera grandi.”
Despues di mas insidente di violensia relatá na droga, munisipio ta kai aden na aprel 2014. Ta bini un prohibishon pa reuní, i vigilansha di kámara den Buxtehudestraat. Ademas polis por listra preventivamente. Violet Roosberg ku ta biba den e área di riesgo designá: “Bon mirá esaki tabata pone mi sinti seif. Tabata tuma medida di bèrdè mes. “ Munisipio ta pone un sentro di bario tambe disponibel pa instansianan sosial.
Para
Hopi be e medidanan di seguridat no ta logra nan meta, habitante di e bario Sendley Roosberg ta haña. Polis ta par’é diferente bia..“Mi mester a habri mi bentana di outo, paga motor. Un polis a manda lus di su flashlight riba mi banki di patras. El a puntra di unda mi a bini i unda mi ta bai. Mi a kontestá normalmente, mi no tabatin gana di pleita.”
Un próksimo bia ora Sendley yega kas polis ta par’é den su kurá, un otro bia ta par’é ora ku e ta kore baiskel den bario. Awor si e ta reakshoná iritá. Mes ora un polis ta bisa ku e ta bai arest’é pero e kos ta kaba na nada.
Listra selektivamente
Segun Sendley polis ta usa nan outoridat selektivamente. “Nunka mi no a mira nan hasi esaki serka hende blanku, solamente si nan ta fuma òf ta bringa. Polis hopi be ta kontrolá antiano ku ta djis para huntu, ku dominó i un serbes, esei ta duna nos mal nòmber. E kos ei no ta sinti bon: bo ta kana pasa anto bo ta mira antiano ku polis.”
Bakker: “Hopi bia tabata akshonnan kordiná ku un briefing kla tokante komportashon. Te asina leu ku mi sa e koleganan tabata korekto.”
Ronald Bakker di polis di Zwolle – potrèt: Pieter Hofmann
Aparensia físiko ta hunga un ròl ora polis para hende? Bakker: “Esei ta un proseso sikológiko kompliká. Den e situashonnan ei tin hopi faktor ta hunga un papel. Si koló ta un di nan? Ta posibel. Ounke ku den un bario kaminda tin hopi hende di koló e chèns di kontrolá un hende di koló ta mas grandi.”
Sinti seif
Sendley ta sinti seif den e bario. “Mi konosé tur hende. Tin bia anochi mi ta tende bala. E ta zona manera vürwèrk, pero mi sa ku ta pistol.”E no tin miedu. “No tin nodi di tin miedu si bo no tin nada di hasi ku nan. Bo ta kumindá nan, nada mas. Bo ta mantené bo distansha.”
Ku e medidanan Holtenbroek a bira mas seif. Habitante Anaïs Roosberg: Tabatin un flèt na Palistrinalaan kaminda antianonan tabata para henter dia. Bo no ta mira nan mas awor.” Sendley: “Tabatin un tiroteo einan. E ora ei nan a bai para den e sentro komersial.”
No tabatin habitante di e bario envolví den e tiroteo. Bakker tambe ta konfirmá ku esnan ku ta bin hasi bochincha hopi bia tabata bini di pafó di e bario òf di pafó di Zwolle. Lokal òf nò, tur dos e gruponan problemátiko no t‘ei mas. “Si awor hende tende ‘Holtenbronx’ nan ta bisa mesora: ma awor no t’asina mas. Ta bai basta bon ounke ainda no ta tur kos ta dje bon ei.”
E medidanan di seguridat lo dura dos aña mas. Wim van Hattem, manager di e bario na nòmber di munisipio : “Nos ke evitá ripitishon, p’esei nos no ta stòp mesora. Nos tin atenshon pa e problemanan i e solushon ta un proseso largu. Pero kisas nos por kuminsá mengua e medidanan di seguridat entrante otro aña.”
Outor Pieter Hofmann
Lesa aki parti un i dos di e seri di tres kapítulo tokante Zwolle.