E tim ku ta atendé registrashon di plaka pa yu. Meimei sintá Nina den Heyer – potrèt: Janita Monna
KRALENDIJK – Ta djárason atardi djis despues di lùnch. Tatanan i mamanan ta drenta unu unu den e sala chikí na Plasa Chiku Goeloe na Antriol. Nan ta bin registrá pa plaka pa yu. Entrante promé di yanüari binidero habitantenan di Boneiru, Sint Eustatius i Saba tin derechi riba esaki.
“38 dòler. No ta mashá ma e ta yuda si”, un señora ku a kaba di entregá su formularionan ta bisa. “Mi tin tres yu. Un a sali for di kas kaba, un ta biba serka su tata i e otro ei – e tin diesseis aña – mi so ta kria. E tin un mirá signifikativo.
Hopi trabou
Na Boneiru, Sint Eustatius i Saba tin 5.800 mucha ta biba. Ounke ku ta 2.800 mayor ‘so’ a pidi – e mayornan mayoria parti tin mas ku un yu – “ta henter un operashon pa registrá nan tur”, Nina den Heyer ta konta. E ta traha komo hefe suplente na Sociale Zaken i Werkgelegenheid. “Nos a tuma seis hende èkstra pa pèrkurá pa tur kos bai bon i nos ta organisá e dianan di registrashon aki den barionan.”
Na T-shirt blanku e trahadónan ta papia ku e mayornan. “Nan a haña un training spesial”, segun Den Heyer. Hende ke sa ki dia e plaka ta yega, kuantu nan ta bai haña. Tin di nan ke sa si nan entrada ta bai atras awó. Pero esei no ta e kaso pa niun hende. Mayornan ku mester biba di ònderstant, òf di sueldo mínimo ta bai dilanti kon ku bai bini. Pa hende ku un entrada riba e suma liber di belasting ku un òf dos yu kos ta keda mas o ménos meskos, i hende ku dos yu òf mas i un entrada riba e suma liber di belasting, tambe ta bai dilanti.”
Rumor
Ku e referèndem di 18 di desèmber binidero tin rumor ku Hulanda ke influensiá e resultado ku plaka pa yu. “Naturalmente ta ko’i kèns”, Den Heyer ta bisa. E preparashonnan pa esaki tin mas ku un aña ta kana kaba.” E mal informashon ta dañino tambe. “Tin mayor ku a lesa de korant ku e registrashon aki ta un plan di Den Haag. Pa kita yu for di mama ku tiki entrada. E ora ei nos mester konvensé hende ku no ta bèrdè.
E mama ta hisa su skouder pa e relatonan aki. “Tin hende ke mira kos malu so. Tin kos bon ta sosodé tambe.” Un tata di un yu di dos aña tambe ta mira e banda positivo: “Nos no tabata haña nada, awor nos ta haña 38 dòler. Ta un kuminsamentu. Mi por kumpra pèmper atrobe.”
Kuenta di banko
Aworó ta bai pasa e plaka di yu pa un kuenta di banko. “Si”, Den Heyer ta atmití “tin hende ku no tin un kuenta di banko. Ku un karta di nos nan ta haña preferensia pa habri un kuenta na banko.” E registrashon mester a tuma lugá lihé. “Hende no tin nodi di tin miedu ku nan no ta haña nan plaka. Kisas e ta bini mas lat ku yanüari, pero e ora ei e ta bini ku forsa retroaktivo.”
Den Heyer no ta prekupá pa e plaka disparsé na snèk òf den kasino. “Mayoria parti mi ta tende mayornan bisa ku nan ta bai pone e plaka riba un kuenta di spar. Pa despues nan yu por kumpra un outo, òf e por bai studia.”
Outor Janita Monna