Minister Ronald Plasterk (Relashonnan den Reino) – potrèt di archivo: John Samson
DEN HAAG – Minister Ronald Plasterk (Asuntunan Interno i Relashonnan den Reino) pa medio di su bosero ta laga sa ku el ‘a tuma nota di e resultado’ di e referèndem ku a tene djabièrnè na Boneiru. Aktualmente e minister no ke saka konklushon ainda.
Djabièrnè un dos terser parti di bonerianonan a vota ‘nò’ kontra e laso aktual ku Hulanda. Segun minister Plasterk awor promé ta na Eilandsraad i Bestuurscollege di Boneiru pa disidí kon mester anda ku e resultado di e referèndem.
Anteriormente e aña aki komishon Spies a konkluí ku komo ‘munisipio ekstraordinario’ e isla no ta probechá sufisientemente di e integrashon ku Hulanda. Tantu serka pueblo i serka otronan envolví despues di sinku aña ta reina un desilushon grandi. P’esei polítikonan na Den Haag no a reakshoná sorpresá ku e resultado. “E señal di mas importante ta ku mester skucha e hendenan mihó”, Wassila Hachchi di D66 ta konkluí. VVD ta laga sa ku un forma mas integrá ku e sistema aktual no ta un opshon. “Kiko sí nan ke na Boneiru awor, ta na Boneiru mes lo mester pens’é” , asina parlamentario André Bosman di VVD ta bisa.
Pa SP awor tur opshon ta riba mesa. “Mi ta masha interesá den e diskushon ku lo bai tuma lugá einan awor”, e miembro di SP Ronald van Raak ta bisa. Segun Van Raak ta importante pa awor sigui un di dos referèndem, pa pueblo por skohe entre e posibel alternativanan.
Si mester bini un di dos referèndem segun e parlamentario di PvdA Roelof van Laar ta ‘un asuntu lokal’. “Mi ta kere e resultado i e direkshon ku mester tuma ta kla. Ta un señal kla di pueblo ku nos mester traha mas duru na mehorashonnan konkreto pa hende. Si ta na nos, nos ke trata pobresa komo promé kos”, segun Van Laar.
Kombersashon
Aktualmente Tweede Kamer ta ku reseso di Pasku. Despues di kambio di aña e parlamentarionan di e Komishon di Relashonnan den Reino lo bishitá e munisipionan di ultramar Boneiru Saba i Sint Eustatius. Riba djasabra 9 di yanüari nan lo bai tene kombersashonnan ku polítikonan lokal.
Outor John Samson