E kuater ministernan di Hustisia di Reino – potrèt: Sharina Henriquez
ORANJESTAD – E aña aki mes Hulanda, Aruba, Kòrsou i Sint Maarten lo interkambiá DNA di kriminalnan i víktimanan.
Esaki e kuater ministernan di Hustisia a primintí despues ku djamars nan a kaba e Deliberashonnan Hudisial di Kuater Partido ku ta tene kada seis luna.
Nan mensahe: koperashon ta mas importante ku nunka den kombatimentu di kriminalidat. Ku e presupuestonan pèrtá nunka no tin sufisiente plaka pa Hustisia. “Laga nos ta franko, doño di un kartel kolombiano tin mas plaka ku e presupuestonan di Aruba, Kòrsou i Sint Maarten huntu”, minister di hustisia di Kòrsou Nelson Navarro a bisa.
E kriminal tambe ta traha mas i mas na nivel internashonal, su kolega arubano Arthur Dowers a bisa. Ta p’esei interkambio di informashon ta keda un prioridat. Banda di DNA e paisnan lo bai kompartí informashon di prezunan i sospechosonan. “Ya asina tur hende ta na altura unda ken ta”, segun minister hulandes di Hustisia Ard van der Steur. Pasobra algun aña pasá a bira konosí ku kriminalnan ku a hui por a biba trankil di nan na e islanan karibense.
Fluho di plaka
E plannan tin komo meta tambe pa kita mas plaka for di e kriminalnan. Pesei Reino ke koperá mihó ku Estádos Unídos, kaminda tin hopi fluho di plaka ta pasa, i ku Merka Latino.
Outor Sharina Henriquez