ORANJESTAD — Minister Otmar Oduber di Turismo, Transporte, Cultura, Cria y Pesca a entrega un carta awe cerca gobernador den cual e ta notifike cu e ta entrega su puesto riba 1 di maart. Na prensa e ta declara sinembargo cu e ta dispuesto pa dialoga cu gobierno y lo por dicidi pa keda toch, si bin cambionan riba tereno di entre otro husticia y finanzas publico.
Despues di su encuentro cu gobernador Fredis Refunjol, minister Oduber a declara na prensa cu e no ta identifica su mes mas cu maneho actual di Gabinete Mike Eman II riba tereno di husticia y finanzas publico. E mandatario ta sinti falta di un plan riba tereno di husticia, particularmente pa loke ta siguridad pa turistanan y den area hotelero.
Scucha declaracionnan di minister Oduber y prome minister Mike Eman na prensa
Oduber ta haya cu e no ta haya oido for di su coleganan pa cu su preocupacionnan. Oduber tambe ta haya cu gobierno mester cumpli mas ainda cu rekisitonan di College Arubaans Financieel Toezicht pa asina por sali for di supervision financiero lo mas lihe posibel.
Fuera di esaki, minister Oduber ta bisa cu e ta keda preocupa pa cu posibel reapertura di refineria. Oduber ta haya cu mester a evalua e interes di Citgo pa cu e refineria mas profundamente, mirando entre otro plannan pa largo plazo cu su ministerio tabatin pa e area di San Nicolas. Ademas minister Oduber ta haya cu gobierno a tranca e ley den cual ta restringi hotelnan pa opera como all-inclusive. Segun Oduber, gobierno di Aruba lo haci bon di pospone cierto proyectonan – e no kier a specifica cua – pa asina duna mas prioridad na e puntonan aki.
E ta bisa cu su porta ta keda habri pa discuti con lo por haci esaki. E ta keda identifica su mes como miembro di e partido na mando AVP, pero ta declarra cu si e dia yega cu e no ta kere den e partido mas y otro opcionnan bira posibel, e lo no basila di tuma nan. Oduber ta bisa cu entre awo cu 1 di maart e ta keda bay trabou pa por finaliza diferente proyecto y facilita e transicion pa su sucesor.
Eman kier papia prome
Prome minister Mike Eman na prome instante no kier a duna un reaccion directo riba e posicion di minister Oduber, bisando cu e kier combersa cune prome a base di ‘colegialidad y amistad’. Sinembargo, reaccionando riba e ponencia di Oduber riba cumplimento cu Caft, e prome mandatario a duna di conoce cu e presupuesto supletorio di 2015 cu a wordo aproba luna pasa y e presupuesto di 2016 cu ta na caminda pa parlamento ta carga sosten di tur minister, incluyendo Oduber.
Autor Ariën Rasmijn