Diputado Clark Abraham (Boneiru) – potrèt: Hazel Durand
THE BOTTOM – Ounke no a palabrá resolushon konkreto durante e Summit di Hulanda Karibense ku a tene djasabra na Saba, sí a identifiká tres punto pa kua ‘mester tuma akshon mesora’. E puntonan aki ta pobresa, desaroyo ekonómiko i e struktura konstitushonal.
“Nos a skucha e preokupashonnan di e bestuurscollegenan ku empatia i nos lo konfrontá e ministerionan konserní na Den Haag ku esaki. Akshonnan den futuro mester ta fuerte, pasobra 2016 mester ta e aña di kambionan struktural”, e lider di e delegashon hulandes, Jeroen Recourt, ta bisa.
Pobresa
Recourt ta bisa ku ta opvio ku e nivel di pobresa na e islanan BES no ta akseptabel. E ta haña ku ku mester bini un resolushon konhunto di gobièrnunan lokal i Den Haag.
Na Boneiru a kalkulá e presupuesto básiko kaba ku ta nesesario pa un hende por biba kómodamente. “Nos ta keda leu bou di e nivel ku tur previshon básiko. Den Haag ainda no a rekonosé e sifranan. Entretantu a aseptá un moshon den Tweede Kamer pa kolektá informashon riba e islanan i kalkulá kuantu e entrada básiko mester ta. Pero ta trata di e akshonnan ku sigui despues”, Clark Abraham, presidente di bestuurscollege di Boneiru ta bisa.
Diputado di Asuntunan Konstitushonal na Sint Eustatius Reginald Zaandam ta bisa ku ta importante pa tene kuenta ku e orguyo fuerte ku tin bou di e habitantenan di e tres islanan.. “Nos ta hende orguyoso. Ora bo kana den kayanan di Boneiru, Sint Eustatius i Saba bo no ta ripará mesora ku tin pobresa.” Zaandam ta bisa ku pa trata pobresa ta nesesario pa krea trabou.
Empleo
“Ta masha importante ku ta sabano ta hasi e trabou na Saba”, Ruard Ganzevoort, miembro di Eerste Kamer pa GroenLinks ta haña. Pa un hende mester por papia papiamentu pa e por traha na Saba ta ridíkulo.”
E parlamentarionan djasabra tabatin un ‘meet and greet’ ku komunidat di Saba – potrèt: Hazel Durand
Na e servisionan di duana, imigrashon i polis na Saba i Statia ta pone trahadó di Boneiru. “Pakiko ta tene sabano abou pa motibu di un barera di idioma? Ingles ta un idioma internashonal i e ta aseptá komo idioma vehíkulo na Saba i Sint Eustatius. No tin motibu pakiko Saba no tin un propio servisio di Duana, a tradusí lei di duana na ingles kaba. Nos mester di nos mes hendenan ei i krea oportunidat pa nos hóbennan.”, Chris Johnson di Saba ta haña.
Abraham ta añadí ku e desishon pa manda amtenar bonerianu Saba, ta kabesnan di departamentu for di Den Haag stashoná na Boneiru a tum’é. “Ta tristu ku e idea ta eksistí ku bonerianu ke kita trabou di sabano, pasobra esaki no ta loke Boneiru ke. Bonairu nèt ke yuda krea mas empleo pa sabano na Saba òf asta na Boneiru.”
Burokrasia
“Tin mucho burokrasia na islanan BES”, Johnson ta bisa. Ta difísil pa haña pèrmit pa kompania i tin muchu regla den inspekshon marítimo i di trabou. Un di e ideanan di Saba ta pa pasa e tareanan aki pa gobièrnunan lokal. Nos konosé nos islanan, ke men pakiko un gran parti di e maneho ta traha na Den Haag miéntras por estables’é i ehekut’é aki.”
“Naturalmente nos koleganan na Den Haag a indiká ku si nos ke esaki, nos mester mustra ku nos por. Ta p’esei nos mester bini ku un plan kla. Esaki ta pidi hopi forsa laboral i ta krea empleo. Esaki lo kita e idea di hopi strañero riba nos islanan”Johnson ta konkluí.
Outor Hazel Durand
Di robes pa drechi: Clark Abraham (Boneiru), diputado Chris Johnson di Sabam diputado na Sint eustatius Reginald Zaandam, Miembro di Eerste Kamer Ruard Ganzevoort i lider di delegashon Jeroen Recourt – potrèt Hazel Durand