Hopi bia mayornan antiano tin miedu ku ta kita nan yu for di nan – potrèt i-psy
UTRECHT/DEN HAAG – Relativamente hopi mayor antiano tin miedu di jeugdzorg. Hans Bellaart, investigadó di instituto Verwey-Jonker: ‘Nan ta pensa: si bo yega einan i mi no ta eduká mi yu segun normanan hulandes nan ta kita mi yu for di mi. Nan tin e idea ku ta husga di un banda so”, i segun e perspektiva hulandes, si bo ta eduká bon òf nò.”
Rhona Eustatius, sikólogo di mucha i hóben na i-psy De Jutters ta konfirmá esaki. “Mi ta kere ta pa motibu di falta di konosementu kiko ggz ta enserá, kiko e instansianan ta hasi. Tambe no ta kustumber den e kultura pa buska yudansa. Hende ta pensa: mi no tin mester di yudansa, ta loko mi ta?
Bellaart: “Tambe tin bruamentu entre yudansa di hóben boluntariamente i protekshon di menor. Protekshon di menor por tuma medida forsoso. Nan ta tende di esaki serka e hendenan ku nan konosé. Asina ta bini e miedu ku si bo hasi un fayo chikí mesora nan ta kita bo yu for di bo.”
Segun e factsheet di e plataforma di Konosementu Integrashon i Komunidat antiano kompará ku otro grupo étniko relativamente ta hasi mas uso di yudansa pa hóben. Pero e yudansa ei no ta konektá presis tur ora.
Edukashon antiano
Un grupo grandi di mayornan antiano ta sinti ku nan no por hèndel e edukashon. E mayornan aki hopi bia ta buska yudansa. Edsel Kwidama, sikiatra i miembro di Konseho di Direkshon di e Grupo Parnassia: “Lo por t’asina ku e ‘propio’ método di edukashon – mama ta manda i e muchanan mester hasi manera e bisa – no ta traha den e konteksto hulandes. Esei ta fòrsa nan di hasi algu sino e muchanan aki ta slep bai atras.”
Kwidama ta mustra tambe riba e diferenshanan kultural ku Hulanda. “Hopi bia ta pa motibu di e kultura matriarkal na Antia. Ta hende muhé ta manda den edukashon di yu. Nan ta traha, kuida i nan tin hopi tarea. Nos sa for di investigashon ku hende di medio mas abou tin asina tantu kos na nan kabes ku tin bia nan ta neglishá kos. Na Kòrsou famia i otro hende ta yuda. Esei ta hasi falta aki.”
Eustatius: “MI ta kere ku mayornan ku bini Hulanda ta bin haña sa e kosnan aki poko poko. Si e ora ei nan tende serka jeugdzorg: bo no ta hasié bon nan ta hala afó hopi bia. Ta p’esei ta asina importante ku e ayudo i e hendenan ta pas bon serka otro, por ehèmpel mester puntra ta kiko ta e kustumber den e konteksto kultural. Ora bo sa esaki numa bo por kuminsá yuda.”
Un klap korektivo
Tin be e konteksto kultural ta trese dilema. Loke den un pais ta un kustumber kultural, otro kaminda ta tabú. Na e islanan di karibe no ta straño si mayornan pasa un klap korektivo, na Hulanda esaki ta prohibí i kastigabel. Eustatius: “Esei ta keda difísil. Di un banda bo ta komprondé si, pero ta mas tantu kon mundu ta mira e kos aki. Esei ta mas importante ku si algu ta bon òf fout. Nos ta splika mayornan antiano kon sobrá hende ta mira e kos aki, i despues nos ta wak otro manera pa nan koregí nan yunan.”
Outor Pieter Hofmann
Lesa parti I aki: ‘Antiano hopi bia ta haña diagnósis robes pa motibu di bias kultural’