Minister Ronald Plasterk (Relashonnan den Reino) –potrèt di archivo: John Samson
DEN HAAG – Minister Ronald Plasterk (Asuntunan Interior i Relashonnan den Reino) promé ku zomer lo entregá un proposishon pa un areglo di disputa. Esei el a primintí awe den Tweede Kamer.
Plasterk ta bisa ku e tin basta tempu ta trata di yega na un akuerdo ku e paisnan karibense den reino. Te ainda no a yega na un akuerdo di disputa.
P’esei promé ku zomer Plasterk ta bini ku un produkto intermedio, kaminda e ta habri e palabrashonnan ku e otro paisnan. Si esaki no logra, e ta hasi un proposishon via Konseho di Minister di Reino. Si ta posibel prome ku 1 di yüni. “Esaki mester bai Raad van State promé si, i despues ta envolví e paisnan. Esei ta un trayekto largu.
Interpretashon
E areglo di disputa ya pa añanan ta un problema. Segun e mandatario tin kuater asuntu di kontenido ku ta difisil pa alkansá un akuerdo pa nan: e definishon di un disputa, kon leu e areglo por yega, e instansha outorisá pa resolvé e disputa i na final e karakter obligatorio di e sentensia.
Pa kuminsá tin e pregunta ken ta disidí si ta mira un asuntu komo un disputa. Awe Plasterk a bisa ku a base di Statüt e ta haña ku por usa e areglo di disputa si un pais ta sintié perhudiká pa motibu di un desishon.”Si un pais haña ku ta trata di un disputa, e ora ei aparentemente ta trata di un disputa.”
Proposishonnan anterior tabata ke pa Konseho di Mnister di Reino husga si ta trata di un disputa. Esaki tabata kontra boluntat di e paisnan karibense. P’esei e interpretashon di Plasterk ta mas amplio: “Mi a aksedé riba e punto aki.”
Segun e minister esaki mester tin konsekuensha pa kua instansha ta resolvé un disputa i tambe pa e karakter obligatorio di e sentensia – dos otro punto di disputa importante. Despues tin e diferensianan di opinion tokante e alkanse di e areglo.
Outor Pieter Hofmann