Sietse Fritsma – potrèt di archivo: Jamila Baaziz
DEN HAAG – Den Tweede Kamer awe partidonan a reakshoná riba e proposishon di lei di Sietse Fritsma i Machiel de Graaf (PVV) pa saka antiano kriminal for di e Hulanda. Fritsma: “Kòrsou ta hasi esaki kaba. Ta straño ku ta un problema sí ora ami proponé pa distinguí entre pais di origen.”
E proposishon di lei mester pèrkurá pa saka hende di Kòrsou, Sint Maarten òf Aruba ku haña sentensia na Hulanda pa motibu di un krímen. Den e kaso aki ta distinguí entre doño di pasaporte hulandes a base di nan pais di nasementu.
Fritsma no ta mira esaki komo problema: “Bo ta mira ku Kòrsou ta pone eksigensia na hulandes oropeo ku no ta konta pa e pueblo propio. Esei ke men distinguí entre pais di orígen. Si Kòrsou hasi esaki no ta un problema, ke men ta un medida ku ta eksistí masha tempu kaba”
Eskala móbil
Si lo saka un hulandes kondená ku ta bini di e paisnan karibense di reino ta dependé di e asina yamá eskala móbil. Mas tiki tempu na Hulanda, mas grandi e chèns riba ekspulshon. Fritsma: “Ke men bo no por bisa ku un delito semper ta kousa ekspulshon. Pero si den un aña despues ku bo a yega na Hulanda bo kometé un echo kastigabel, lo sigui ekspulshon.”
E mésun areglo ta konta den derecho di estranhero. Por saka strañero ku un pèrmit di estadia despues di un sentensia dependiente di e eskala móbil. Ku e lei di Fritsma ta igualá hulandes di e paisnan karibense di reino na hende ku un pèrmit di estadia. “Nos ta haña e komparashon bálido pasobra den tur dos kaso ta trata di hende di un otro pais”, Fritsma ta bisa.
Krítika
Anteriormente Raad van State a husga negativamente riba e proposishon di lei. Partido di gobièrnu PvdA ta rechasá e proposishon pasobra e ta distinguí entre hulandes. “Manera Raad van State a konkluí kaba, no tin un motibu hustu pa e lei diskriminatorio aki.” Pero partido di koalishon VVD ta bisa ku nan ta kompartí e prekupashonnan tokante e sifranan di kriminalidat di antiano. Anteriormente e parlamentario André Bosman a entregá un proposishon di lei pa pone eksigensha di establesimentu na antiano.
SP ta konkluí ku e lei di Fritsma ta kousa desigualdat, D66 ta haña ku ta un infrakshon di nashonalidat hulandes indivisibel. CDA ta pensa ku hurídikamente no por mantené esaki.
Outor Pieter Hofmann