Minister Schwengle na palabra durante e conferencia di prensa di awe. Na su banda Dr. Salazar – potrèt: Ariën Rasmijn
ORANJESTAD — Despues cu recientemente a anuncia cuater casonan importa, Aruba a registra seis caso di Zika cu a wordo transferi localmente, haciendo e malesa uno endemico pa e isla. Esaki a wordo anuncia awetardi durante un conferencia di prensa.
Wilmer Salazar di management team di Departamento di Salubridad Publico ta bisa cu infeccion local tabata inevitabel. Ya for di aña pasa, ora cu na diferente pais den region e malesa a cuminsa plama, Departamento di Salubridad Publico a cuminsa screen pa localmente pa Zika y formula un plan di accion pa ora cu e malesa yega Aruba.
Segun Minister di Salubridad Alex Schwengle, Aruba awor ta oficialmente riba e list di paisnan na unda zika ta un malesa endemico y esaki segun e minister lo por tin su consecuencianan pa industria turistico. E siman aki caba lo bay cuminsa cu un accion di limpiesa riba escala grandi pa kita mas tanto criadero di e sangura aedes aegypti cu ta posibel riba henter e isla.
Tambe lo start cu un campaña di conscientisacion y lo bay keda den contacto cu e gremio turistico, dunando informacion pa turistanan. Pa e accionnan aki gobierno a aparta alrededor di mey miyon di florin, segun minister Schwengle.
Autor Ariën Rasmijn