Mitch Henriquez – potrèt: Facebook
HILVERSUM – Gerald Roethof, un di e abogadonan di e famianan di defuntu Mitch Henriquez, ta iritá pa e manera di komportá di Ministerio Públiko (OM). Na un enkuentro riba 29 di febrüari e abogadonan di e sinku polisnan sospechoso den e kaso por entregá nan deseonan pa investigashon.
Esaki ta tuma lugá tras di porta será. E abogadonan di e famianan, kontra di Roethof su gana, tampoko no tin akseso.
Segun OM ta reglá den lei ku un seshon di direkshon ta será. “E ta forma parti di un investigashon ku ta kore ainda. Pa no stroba e investigashon aki, e ta tuma lugá tras di porta será: solamente ku wes-komisario, fiskal i e abogado di e sospechosonan”, asina bosero Ilse de Heer a bisa.
Roethof: “Ta OM a skohe esaki. Ami lo a preferá di mir’é diferente. A lucha hopi pa huisio penal públiko, manera mester ta den un komunidat demokrátiko. Esaki no tin mi preferensia anto mi ta ekspresá mi mes eufemístiko.”
Sigui krítikamente
“Komo abogado di e víktima òf e famianan ta lástima ku bo ròl ta limitá”, Roethof ta sigui. E por imaginá su mes si kiko e lo a hasi si e tabatin akseso. “Lo mi a sigui un ke otro krítikamente. Lo mi a trata di splika e fiskal kiko no ta klòp asina mi mira ki direkshon e abogado di e sospechosonan ke kue.”
OM no ke reakshoná riba e pregunta si e ousensia di e abogado di e víktima no ta un oportunidat pèrdí. Tampoko OM no ke kontestá e pregunta ku t’asina ku e polisnan sospechoso nan privasidat ta mihó protehá pa kousa di nan profeshon.
No ta promé bia ku OM ta haña hopi krítika. Dia Mitch Henriquez a fayesé na yüni di aña 2015 pa kousa di violensia di polis OM a haña krítika pasobra nan a tuma un deklarashon di prensa, ku a bini di polis, ofer sin kambi’é. Polis a bisa ku Henriquez a bira malu den un bùs di polis pero imágennan di kámara a mustra ku no tabata bèrdat.
Slo
Na novèmber di 2015 Richard Kòrver, un otro abogado di e famianan, a kritiká e sistema slo di traha di OM. Ainda OM mester di diferente luna mas pa tuma un desishon tokante un eventual persekushon. “Pero no por bisa eksaktamente kuantu mas.”
Outor Pieter Hofmann