Potrèt di archivo: John Samson
LEIDEN – Hulandes oropeo i strañero no tur ora ta bon biní na Aruba, Boneiru i Kòrsou. Esaki ta sali for di sifra nobo di KITLV (Koninklijk Instituut voor Taal-, Land- en Volkenkunde).
E investigadónan a puntra e habitantenan di e partinan karibense di reino kiko nan ta haña di e presensia di imigrante i turista. 54 porshento na Kòrsou i 42 porshento na Aruba ta bisa ku tin muchu hulandes oropeo ta biba riba nan isla. Na Boneiru e votamentu a sali mas negativo ku tur: 73 porshento. Segun KITLV esaki lo tin di hasi espesialmente ku e relashon estatal nobo for di 2010.
Turista hulandes
Ora ta trata spesífikamente di turista hulandes, e habitantenan no ta masha positivo tampoko. Na Boneiru i Kòrsou 45 porshento ta haña ku tin muchu turista ta bini di Hulanda. Segun e investigadó Wouter Veenendaal ta remarkabel kuantu ta keha tokante e komportashon di turista hulandes riba e islanan. Na Aruba kasi 58 porshento ta positivo tokante turista hulandes.
Strañero
E investigadónan tambe a puntra e habitantenan si nan ta haña ku tin muchu strañero ta biba riba nan isla. 95 porshento di e arubanonan ta di akuerdo ku e ponensia. Na Boneiru tambe (80 porshento) i na Kòrsou (83) tin problema ku e presensia di strañero na nan isla.
A tene kuenta ku resistensia mundial kontra migrante i tenshonnan ku a surgi despues di 10-10-’10. E sientífikonan no a ferwagt sifra asina hatu. Nan ta bai sigui analisá e resultadonan di e investigashon.
Islariba
Loke tambe ta ripará ta ku e resistensia kontra hulandes oropeo na Saba i Sint Eustatius ta ménos. “Nos ta mira resistensia si kontra otro strañero, manera haitiano i dominikano ku a bai biba riba e isla”, Veenendaal ta bisa.
No tin sifra di Sint Maarten,e sientífikonan tin un sospecho fuerte ku e enkuestadónan lokal a kometé froude ku e datonan.
Outor John Samson