Danielle Cohen Henriquez ta biba i traha na Brusélas
BRUSÉLAS – Na Den Haag e representashonnan di Aruba, Kòrsou i Sint Maarten ta yama otro den oranan di meinta i atardi. Tur kolega na Brusélas ta seif? Tin sigur un diplomátiko arubano na Brusélas. E ta traha serka di e stashonnan di metro Schuman i Maelbeek, kaminda e di dos atake a tuma lugá.
Ta trata di Cedrik Tilma, i ta resultá ku e ta seif. “Ayera na e mesun ora mi tabata den metro ainda. E liña bou di De Wetstraat ta un ruta drùk kaminda tin hopi hende ta biaha. Asina e teroristanan tambe lo a pensa”, Tilma ta konta.
Doloroso
Tilma ta disidí di keda kas ora e tende e notisia. “Mi ker a keda serka mi famia. Despues un hende a yama mi ku a kore pasa nèt ora di e eksploshon. El a konta mi kon e hendenan a sali tur na sanger i stòf. Teribel. Ta masha doloroso pa Bèlgika, pa Oropa tambe. Mi ta spera ku hende lo bai reakshoná korektamente. Mi pensamentunan ta ku e víktimanan i nan famianan.””
E kurasoleño Danielle Cohen Henriquez te atardi no tabatin pèrmit pa sali di su trabou. “Riba kaya tur kaminda tin militar, polis i tènk. Mas tantu ku durante e lockdown di kuater dia despues di e atentadonan na Paris. Tur hende a ferwagt for di e dia ei ku algu lo pasa. Ta manera nos tabata sintá riba un bòm kla pa eksplotá.”
Kustumá ku e idea
“Tòg ta manera e siudat ta kalma mas lihé ku a ferwagt”, Cohen Henriquez ta bisa. “Ta manera hende a haña sufisiente tempu pa kustumá ku e idea di peliger di terorista. E metronan i e treinnan ta kore atrobe, probablemente skolnan lo habri mañan. Entretantu nos sa aki tambe ku no tin niun sentido pa sera nos kurpa paden dianan largu, bida mester sigui tòg.”
Kon lo sigui awor Cohen Henriquez no sa ainda. “Aktualmente ta difísil pa mira e konsekuensianan. Di tur manera e diskushonnan den Union Oropeo lo bira mas difísil. Pero por lo pronto mi no ke bai for di e siudat aki. Ainda tin muchu kos di hasi aki.”
‘Horibel’
Ann Phillipps di Kas di Kòrsou na Den Haag ta biaha pa Brusélas tur luna pa representá Kòrsou. Den su idea e atentadonan ta bini ‘hopi serka’. Mi ta haña horibel. E stashon di metro tampoko no ta masha di leu di kaminda semper mi ta bai keda.”, e ta konta.Bon mirá ta awe numa Phillips mester a bai Hulanda bèk, ma e por a bai for di ayera. Telefon di Kòrsou ta interumpié; awor di su famianan preokupá.
Outornan Pieter Hofmann i John Samson