Akhtam Abu Fakher
WILLEMSTAD – Kòrsou tin su mannan yen ku e refugiado di Syria Aktham Abu Fakher (26). Su kaso ta mustra klaramente ku e pais hóben tin difikultat di hèndel problemátika di strañero. Akhtam tin chèns di keda pegá sin solushon despues ku dia 19 di yanüari el a hui for di Venezuela.
Riba konseho di Embahada Hulandes na Caracas el a pidi asilo na Kòrsou. Aktham for di e dia ei ta detené, miéntras ku el a pidi asilo polítiko.
Maneho
E motibu ta e falta di legislashon riba e tereno di maneho di asilo. “Kòrsou no tin nada”, abogado Berend Scheperboer ta bisa. E ta okupá su mes ku maneho di strañero na Kòrsou. Den práktika esaki ke men ku ta improvisá. “Esaki bou di tur sirkunstansia ta haña un otro kontenido.”
Un funshonario di imigrashon na aeropuerto ta hasi e kos mas pió atrobe: “Si nos tin un problema na Hato ta yama un funshonario na telefon i ta e ta disidí kiko ta bai sosodé. A base di kiko no ta kla. E hòmber aki no tin outorisashon di minister kende ta e úniko ku komo eksepshon por tuma desishon.”
E kaso e siman aki a kue un otro direkshon ora a bira kla ku servisio di seguridat di Kòrsou tabata okupá su mes ku Aktham. Direktor di Krus Kòrá a laga sa esaki den un email na un representante di Aktham.
Papel
Formalmente UNHCR a designá e organisashon ei pa duna asistensia na refugiadonan na Kòrsou. Pero e direktor ta laga sa ku e no ke duna komentario riba e kaso. E ta asta nenga di ta envolví den e kaso, pero despues di poko tempu ta atmití ku Krus Kòrá si ta aktuando pa regla e bon papelnan pa Akhtam por bai Hulanda bai pidi asilo.
Berend Scheperboer ta pensa ku e chèns ta mas grandi ku e siriano por lo pronto lo keda den detenshon. “I esaki ta pèrmití tambe pasobra e no tin entrada.” E no por pidi asilo polítiko, pero detenshon eterno tampoko no ta un posibilidat. “Maksimalmente seis luna anto Kòrsou mester toler’é. Meskos ku un kantidat grandi di strañero ku no por saka, pasobra e pais kaminda nan a sali no ke nan bèk, manera Cuba. Falta di e maneho di asil ta toka mas hende.”
Boneiru
Tòg e abogado tin speransa pa Aktham. “Komunidat islamítiko na Kòrsou ya kaba ta regla un ke otro p’é. Nan lo tum’é den nan komunidat si, si e sali liber. Pero un biahe pa Hulanda for di aki lo no logra.” E funshonario di imigrashon si sa un solushon: “si e ta sabí e ta sali ilegalmente ku un boto bai Boneiru. E isla ei ta parti di Hulanda. Ei si nan legislashon ta reglá”
Outor Dick Drayer