Pòmpnan di pisina den estado deplorabel – pòtrèt: José Manuel Dias
WILLEMSTAD – E deporte di natashon na Kòrsou ta na punto di kolèps pa falta di mantenshon na e dos úniko pisinanan públiko. E pisina na Sentro Deportivo Kòrsou (SDK) ya tin mas ku kuater luna será miéntras ku na pisina Bennie Leitu ta teme ku un ora pa otro e sistema di pòmp lo por stòp di funshoná.
Si esaki mester sosodé ta nifiká ku Kòrsou ta keda sin pisina públiko i mester bai dependé totalmente di pisinanan privá. Ámbos pisina ta kai bou di Fundashon Desaroyo Deportivo Kòrsou (FDDK) ku ta e instansia ku gobièrnu a instituí pa manehá e diferente fasilidatnan deportivo di gobièrnu.
Un reportahe di José Manuel Dias:
E echo ku e pisina di SDK tin mas ku 4 luna será ta difikultá kompetensianan pasobra pisina Bennie Leitu no tin e midínan rekerí pa kompetensia. Esaki ta perhudikando klupnan di natashon i hóbennan ku ke bai kompetí den eksterior. Segun direktor di FDDK, Thakai Doran, pisina Bennie Leitu su largura no ta yega 50 meter presis. “E pisina di SDK ta e úniko pisina ku ta kumpli ku tur eksigensia pa por kompetí internashonalmente”, Doran a bisa.
N’e momentu aki tin mas ku 40 skol ku ta hasiendo uso di pisina Bennie Leitu komo konsekuensia di seramentu di e pisina di SDK. Esaki ta formando un preshon hopi grandi riba e kapasidat di e pisina. Meskos ku na SDK pisina Bennie Leitu tambe falta hopi mantenshon prinsipalmente na e sistema di pòmp awa. “E estado di e pòmpnan ta dje deplorabel ei ku un ora pa otro nan por kai afó”, Doran a remarká. Renobashon di e sistema di pòmp ta rekerí un invershon di 450 mil florin.
1.5 mion florin
E pisina di SDK ta será for di novèmber di aña pasá pa motibu ku GGD a detektá sierto bakteria den e awa. A laga saka tur e awa di e pisina pa despues yena awa fresku pero despues a resultá ku e mosaikonan a kuminsá lanta. For di un análisis ku a laga hasi di e fundeshi a resultá ku e fundeshi ta den bon estado pues no mester konstruí un pisina nobo. Lo ke si mester hasi ta drecha e fondo di e pisina, sea ta bolbe pone mosaiko òf ta pone un ‘coating’. E sistema di pòmp awa tambe ta hopi defisiente i mester keda renobá. Total e drechamentu di e pisina lo kosta 1.5 mion florin.
Reda Sosial
Reda Sosial ta e instansha ku gobièrnu a enkargá pa enkaminá e proyekto di renobashon di e pisina di SDK. Hecho ta ku e pisina tin kuater luna kaba para bashí i no tin ningun indikashon ta ki dia lo kuminsá drecha e pisina aki. Thakai Doran ta lamentá ku Reda Sosial no ta dunando FDDK informashon ni tampoko ta tene kuenta ku punto di bista di FDDK. Doran ta boga pa laga drecha tur dos pisina simultáneamente.
Entretantu minister enkargá ku Asuntunan General, Ben Whiteman, a konfirmá ku djabièrnè último gobièrnu a depositá plaka riba kuenta di Reda Sosial. “Gobièrnu a aprobá e sèn pa drecha e pisina di SDK”, Whiteman a deklará. No ta konosí ainda ta ki dia ta bai kuminsá ku e trabounan.
Outor José Manuel Dias