Dr. Wouter Veenendaal ta investigá polítika, demokrasia i maneho na e partinan di reino karibense despues di e reformashonnan di 2010 – potrèt: John Samson
LEIDEN – Habitantenan di e partinan karibense di reino ta haña ku nan isla tin hopi nesesidat di e sosten i supervishon di Hulanda. Pero e aktitut di Den Haag kontra e islanan mester kambia lihé. Esaki ta e konklushon di sientífiko Wouter Veenendaal despues di un investigashon di opinion amplio riba e islanan.
Anteriormente KITLV a publiká un kantidat di sifra di e sondeo di opinion pa kada isla. Despues di lunanan largu di investigashon e rapòrt final ta kla i eiden ta kompará e resultadonan di e investigashonnan i islanan ku otro.
Habitantenan di e partinan karibense di reino ta sinti nan mes neglishá pa Hulanda: nan tin un sintimentu fuerte ku na Hulanda no tin sufisiente konosementu tokante e islanan i ku tin poko rèspèt pa kultura antiano.
For di e investigashon a sali ku habitantenan di e islanan ta duna Hulanda hopi balor. Por ehèmpel pa tin un pasaporte hulandes, protekshon militar i sosten hulandes pa kombatí kriminalidat internashonal.
Mas o ménos tres kuart di e habitantenan di e partinan karibense di reino ta kontentu ku Hulanda ta supervisá e gobièrnu i e finansanan di gobièrnu. Esaki ta konta tambe pa e paisnan outónomo Aruba i Kòrsou. Tambe e sosten finansiero for di Hulanda 80 porshento ta haña ‘nesesario’ te ‘masha nesesario’. Mas o ménos 90 porshento ta haña importante ku nan yunan ta siña Hulandes na skol.
Ministerio
E sientífikonan di e instituto djamars a presentá e resultadonan di e investigashon na e ámtenarnan di ministerio di Asuntunan Interior i Relashonnan den Reino. No tin rekomendashon den e rapòrt final di e sondeo di opinion. “Nos no ta bai tuma e lugá di esnan ku ta traha e maneho”, segun Veenendaal. “Nos ta spera ku ministerio i e polítikonan di Den Haag lo lesa e resultadonan bon i kisas a base di esaki, adaptá e maneho di e islanan.”
Polítika lokal
Esnan ku a respondé no solamente ta kritiká e aktitut di Den Haag, sino e polítiko lokal tambe. “Bon mirá riba tur isla ta husga negativamente tokante e konfiabilidat di polítikonan propio i kuantu e propio polítiko ta representá e interesnan di pueblo.”
Arubano i sabano ta ménos negativo di tur isla, miéntras ku kurasoleñonan ta esnan mas negativo tokante nan mes polítikonan. Espesialmente e kaso den korte kontra èks promé minister Gerrit Schotte i e asesinato di Helmin Wiels lo tabatin gran impakto riba e konfiansa den polítika lokal, Veenendaal ta konkluí. “E instabilidat polítiko na Korsou tampoko no ta bon pa e konfiansa.”
Sondeo di opinion
E instituto kabamentu di 2015 riba tur isla a puntra e habitantenan nan opinion tokante polítika i gobernashon den Reino i e relashon ku Hulanda. E entrevistanan tabata personal, ku lista di pregunta. E sifranan di Sint Maarten no t’ei pa motibu di supuesto froude ku e datonan di enkuestadó lokal. E rapòrt final ku un análisis ekstensivo i lista di sifra pronto por download via e website di KITLV.
Outor John Samson