Raad van State – potret: Pieter Hofmann
DEN HAAG – Na Raad van State awe tabatin e apelashon di Kòrsou kontra e ministerio di Asuntunan Interior i Relashonnan den Reino (BZK). E tópiko tabata e ehekushon di e supervishon finansiero.
Anteriormente Rijksministerraad a disidí pa prolongá e supervishon finansiero di Kòrsou. Esaki a sosodé riba konseho di e komishon di evaluashon Rijkswet financieel toezicht (Rft). Kòrsou a apelá esaki.
Motivashon
Rogier van den Heuvel, abogado di Kòrsou, a enfatisá ku gobièrnu no ta kontra e prolongashon di e supervishon. Kòrsou no ta di akuerdo ku e motivashon ku e maneho finansiero lo no ta sufisiente. “E ta sufisientemente di nivel pa di tur manera por kumpli na e normanan di artíkulo 15 di Rft.”
Segun Van den Heuvel e normanan pa maneho finansiero ku Gobièrnu di Reino ta imponé no ta sali for di e Lei di Reino. Na final e normanan ta bira mas i mas haltu, miéntras ku nan mester ta inekivokabel. “A traha palabrashon di trabou entre Cft (College financieel toezicht) i gobièrnu di Kòrsou, pero esaki no ta kambia e normanan di Rft.”
PEFA
Segun Elisabeth Pietermaat, abogado di BZK, Cft i e ministerionan di Finansa di Kòrsou i Sint Maarten a skohe pa e Performance Measurement-framework (PEFA) pa komprobá normanan finansiero. Curaçao a kumpli ku diesshete di e bintiseis normanan.
Segun Van den Heuvel e normanan di PEFA na prinsipio tabata un rekurso. Den kurso di tempu e aplikashon a bira mas severo i e instanshanan finansiero a ekspandé nan outorisashonnan poko poko. “Gobièrnu di Kòrsou ke duna kuenta segun normanan kla i esaki ta falta aktualmente.”
Pietermaat ta masha positivo tokante e mehorashonnan di e maneho finansiero di Kòrsou. Pero esaki segun e no ta kita ku ainda Kòrsou strukturalmente no ta hiba un maneho finansiero sano. Kòrsou no a kumpli tres aña tras di otro ku e norma di Rft. Cft pa tur aña a traha un restrikshon serka e presupuesto pa e servisio di kapital. Tantu Kontraloria General komo accountant interno no a duna niun deklarashon di aprobashon pa un kuenta anual.
No ta konosí ainda ki dia Raad van State lo sentensiá
Outor Pieter Hofmann