Si bo paga un euro lo bo por gana 3000 euro komo premio mayó – potrèt: John Samson
DEN HAAG/AMSTERDAM – Es ku ke masha fásil por partisipá na Wega di Number di Kòrsou.”Loteria di Kòrsou’ den siudatnan grandi ta un sekreto públiko.
Un hòmber surnameño riba merkado di Amsterdam Zuidoost sa mésora di kiko ta trata i unda por haña e bendedó di number. “Ora e t’ei tin bia tin asina un kareda di hende ku ke kumpra number serka dje. Pero awe mi no a mir’é ainda.” Den un tienda antiano na Rotterdam un trahadó ta kore warda un bòn yen di number di kuater sifra ora puntr’é pa Wega di Number.
Na Den Haag ta logra mas mihó pa haña number kumpra. Ei tin hopi mas tienda i restorant antiano. Riba e tonbank di e promé restorant kurasoleño chines ku nos drenta, tin un edishon bieu di Èxtra i den un kashi di keinta kos tin lumpia i pastechi.
Un mucha hòmber di mas o ménos 12 aña di edat ta sali for di bou di e tonbank di palu. Na un papiamentu sin aksento e ta splika kon Wega di Number ta bai: e preis di mas abou ta 50 sèn pa dos òf tres sifra, un euro pa kuater sifra.” Sorteo ta tur dia na Telecuraçao, nueb’or ora lokal. “Wak, tur e numbernan aki no ta pèrmití” E ta mustra riba e aviso riba e buki di number ku ta kasi bashí kaba.
Riba e lòt klaramente tin imprimí ‘Wega di Number Kòrsou. Legal? E ta kue su telefon i drenta bou di tonbank atrobe. “Si bo gana, pasa mañan bo ta haña bo sèn.” Di tur manera no tin nodi di paga belasting riba e plaka ku a kumpra number kuné.
Outoridat di wega di suerte
E outoridat di wega di suerte na Hulanda ta bisa ku nan ta na altura ku na Hulanda por ta tin lòt di un loteria kurasoleño. “Un sorteo tur dia na Hulanda no ta pèrmití. Bo por tene maksimalmente 16 sorteo pa aña”, segun e bosero. Ta pesei ta imposibel ku e loteria aki manera ta hung’é awor lo tin pèrmit na Hulanda.
Na Kòrsou nan no sa di nada. Un kolaboradó di fundashon Wega di Number Kòrsou, responsabel pa e sorteo diario na Kòrsou, ta bisa ku ‘e no konosé’ bendedó di number òf lugá di bende number na Hulanda. “Ta ilegal. Nan ta usa nos sorteo, esei so.”
Sinku tipo di number
Un otro restorant na Den Haag tambe tin number riba su menú. Tras di bar tin buki di number usá. Un kliente ta haña loke el a pidi i e ta bisa ku e ke paga “tur kos huntu” ku su pas di banko, miéntras ku e ta mustra riba un bòn ku number.
“B’a kere ku ta na Kòrsou so por haña number?”E señora ta kuminsá hari. “Aki bo por skohe entre sinku tipo di loteria. Un di Kòrsou, un di Boneiru, un di Aruba i dos di Sint Maarten. Esun di mas konosí ta esun di Kòrsou: Wega di Number di Kòrsou.”
“Mi ta skibi e website pa bo kaminda mañan bo por mira si bo a gana.” Un hòmber ta kana drenta e restorant ku un blachi yen di number. “Ayera tabata malu. Mi no a gana nada”, e ta bisa.
Si na ta paga? “Kompolaga. Ma bo mester warda e bòn bon si. Bo por gana 3.000 euro”e ta bisa kariñosamente.
Outor John Samson