Angel Statie (91) ku ta kuida su yu muhe (46) ta hopi preokupa di su yu – Potrèt: Dulce Koopman
WILLEMSTAD – E fayesimentu resien di algun mayor di edat avansá ku tabata kuida nan yu ku limitashon ta ilustra kon grandi e nesesidat na Kòrsou ta pa un sentro di bibienda pa personanan ku hendikèp. Prinsipalmente ora ku e mayornan ansiano fayese ta surgi un situashon hopi urgente.
Angel Statie (91) ku ta kuida su yu muhe (46) sa pasa anochinan sin por drumi pasobra e ta hopi preokupa kiko lo para di su yu ora ku wowonan sera pa semper.
Dulce Koopman ta papia ku Junny Harms i mayor Angel Statie.
Segun Junny Harms, presidente di Asosashon di Mayor, Totolika, persona ku limitashon por resulta den un situashon hopi ferfelu ora ku su kuidadónan no tei mas. Pesei e ana aki mes Totolika ke logra ku ta kuminsa i yega hopi leu ku konstrukshon dje sentro di bibienda pa personanan ku hendikèp, na Sapate.
Angel Statie, ta un eks nabegante i ta ko-fundadó di Totolika. E ta eligí komo Persona di Aňa 2015 di Totolika. Statie ta haňa merito pa su kontribushon te ainda na Totolika, no opstante di su edat altu i ku un yu ku limitashon. Angel Statie a bisa: “Nos a haňa ku ta nos deber pa kuida nos yu na kas, tantu ku ta posibel. Pero naturalmente tin hende ku no por hasie”. Ta pesei Statie ta urgi e hendenan ei pa realisa kon importante ta pa ta den un organisashon manera Totolika i pa no skonde nan yu ku limitashon.
Outor: Dulce Koopman