André Bosman – potrèt: Jamila Baaziz
DEN HAAG – Minister Ronald Plasterk (Asuntunan Interior i Relashonnan den Reino) ta bai pidi gobièrnu di Kòrsou pa hasi e business case di Hòspital Nobo Otrabanda (HNO) públiko.
Plasterk a primintí esaki na petishon di e miembro di Tweede Kamer André Bosman (VVD) durante un deliberashon di e komishon di Relashonnan den Reino. Plasterk ta bisa ku e ta bini ku un kontesta promé ku zomer.
Business case
Bosman ta prekupá pa e transkurso di e konstrukshon di e hòspital nobo na Otrobanda. Aworakí HNO ta sali 78 mion mas karu. “Anto nos no a kaba di konstruí ainda”, e parlamentario ta bisa. Tambe e ta puntra si e business case di HNO ta klòp. Mester bini mas transparensia ora hasi esaki públiko.
Segun Plasterk e echo ku a surpasá e gastunan durante e konstrukshon di e hòspital no ta algu úniko i Kòrsou por paga esaki di su propio fondonan. “Tampoko no por bisa numa ku ta e business case lo no ta klòp anto.”
Bosman tabata hopi mas positivo tokante e maneho finansiero di Kòrsou en general. Segun e, gabinete Whiteman a solushoná mayoria di e problemanan. E ta prekupá si pa e NVnan di gobièrnu Aqualectra i Cpost.
Statia
Pero e mandatario di VVD tin prekupashon mas grandi si pa Sint Eustatius. E ta kere ku e fayonan den e maneho finansiero ta relatá na falta di bon mandatario. Plasterk a konfirmá ku e isla ta haña guia den ehekushon di e maneho finansiero, pero ku e kapasidat gubernamental ta chikí pa motibu ku tin poko hende ta biba ei.
Sint Maarten
Bosman ta kulpa Sint Maarten di instabilidat politítiko i finansiero. Na 2015 e pais no a fia segun e último rapòrt di College financieel toezicht (Cft), pero si nan a atraé un asina yamá ‘overdraft facility’ di maksimalmente 5 mion florin. Ku esaki gobièrnu por surpasá límitenan finansiero, algu ku Cft ta kontra di dje. Segun Bosman tambe esaki ta nifiká tuma un fiansa, miéntras ku na sèptèmber di 2015 Sint Maarten a haña un instrukshon ku ta hasi esaki imposibel.
Outor Pieter Hofmann