Freemover Angeline Delisca ta bai studia na Hulanda, sin aplika pa un beka na Kòrsou. – Potrèt: Dulce Koopman
WILLEMSTAD – E kantidat Freemovers, e hobennan ku ta bai studia riba nan mes na entre otro na Hulanda, sin aplika pa un beka na Kòrsou, ta oumentá. Prinsipalmente studiantenan ku ta di desendensia ekstranhero ta hopi interesá den e forma aki di bai studia.
Tur studiante ku tin intenshon i ta prepara pa bai eksterior, por akudi tur djasabra na Biblioteka Públiko, na ‘Studiekeuze 123. Jealaine Alexander, konsehero di eskoho di profeshon i direktor di My Future Career ta konstatá ku e grupo di ‘Freemovers’ ta bai prinsipalmente Hulandata grandi i ku nan tin mester di atenshon èkstra.
Dulce Koopman a papia ku studiante Angeline Delisca i Alexander-Wawoe
Na 2011 gobièrnu hulandes a kuminsa ku e inisiativa pa Studiekeuze 123 na Kòrsou i habri un punto di sosten pa hobennan haňa informashon pa prepará nan mes pa bai Hulanda. Esaki pasobra tog tin hopi hoben ta bai Hulanda sin tin e preparashon nesesario.
Inisialmente Hulanda a finansia e proyekto parsialmente. E intenshon tabata pa Kòrsou tume despues over. Jealaine Alexander: “Lamentabelmente ora ku ministerio di enseñansa a bisa pa Kòrsou tuma e Steunpunt over, gobièrnu no a mira nesesidat dje proyekto ni tampoko e tabatin sèn pe”. Jealaine Alexander mes a tuma e proyekto ku koperashon di Biblioteka Publiko i boluntariamente ta duna informashon na e studiantenan.
Kantidat a subi
Mientrastantu segun Jealaine Wawoe-Alexander, hopi hoben ta bishita e punto di informashon na Bibilioteka Publiko. E aña aki por nota kaba ku tin oumento di e kantidat di studiantenan ku ta bai Hulanda.
Na Hulanda, entre otro Kas di Kòrsou den pasado a alarma ku e Freemovers-nan ku frakasá, por resultá den situashonnan hopi deplorabel. Nan no tin un beka di gobièrnu di Kòsou, nan no ta registra i no ta fasil pa nan haña yudansa. Tin situashon kaminda ku e studiante Freemover no ta informa su mayornan di su problemanan i ta bin hasta ta resulta riba kaya.
Jealaine Alexander ta boga pa e registro di Freemovers na Hulanda, tuma luga en koperashon ku Stichting Studie Financiering (SSC) i otro instanshanan di enseňansa . “Den kurso di añanan nos a realisa ku nos mester traha huntu pa konhuntamente logra hopi”. Nos ta traha ku algun organisashon mi ta spera ku gobièrnu tambe lo djoin e ehersisionan pa logra registro dje studiantenan, algu ku lo ta bienestar di nos propio komunidat, Alexander a enfatisá.
Outor: Dulce Koopman