Tim di abogado di Melaan i Thomas – potrèt: Belkis Osepa
KRALENDIJK — Korte Komun di Hustisia ta disidí pa mas tardá riba dia 11 di aprel kiko lo ta altura di e montante ku lo paga Andy Melaan i Nozai Thomas komo daño i perhuisio ku nan a sufri, relashoná ku e eror hudisial den e kaso di dòbel asesinato di Spelonk na 2005.
Tantu Melaan komo Thomas a haña apsolushon den e kaso aki aña pasá. Djabièrnè último a trata e kaso di pago di daño i perhuisio na Kòrsou riba petishon di e abogadonan. E tim di abogado Geert-Jan Knoops no por a yega na un akuerdo ku Ministerio Públiko (OM) riba e kompensashon pa daño i perhuisio. Nan a ninga e petishon di OM pa wanta e kaso te yüni i a ninga tambe un forskòt di dies mil euro.
Andy Melaan, kende a sinta ocho aña inhustamente pa e asesinato di e rumannan Martis, ta pidi un kompensashon di 1.6 mion euro, plùs 96 mil euro pa pago di e ekspertonan forénsiko i di telekomunikashon ku a traha den e kaso. Ademas e suma aki ta pa paga tambe guia sikiátriko i gastu di boluntarionan. E demanda di Nozai ta ménos. El a sinta sinku aña inhustamente i ta pidi 85 mil euro, plùs 60 mil euro pa pago di ekspertonan.
Pro deo
Abogado Carry Knoops-Hamburger a trese dilanti ku su ofisina, Knoops Advocaten, a tuma e defensa di Melaan i Thomas kompletamente pro deo na nan enkargo. Esaki ta nifiká ku estado hulandes ta kubri un porsentahe di e gastunan ku e ofisina a hasi. No ta pidi pago pa nan trabou. Carry Knoops-Hamburger: “Nos a haña di RCN 40 euro pa ora di trabou hinká den e kaso. Nos a sufri un pèrdida di 185 mil euro ku e kaso aki.”
Tantu Knoops-Hamburgers komo abogado Geert-Jan Knoops a splika den korte e situashon personal di e dos víktimanan dje fayo. Segun e abogado nan ta sinti ku OM no ta tuma nan na serio i ta ignorá nan. Tantu Melaan komo Thomas mester haña guia síkiko profundo. Asina por konkluí for di palabranan di Knoops-Hamburgers. E ta bisa ku nan ta sufri dje malesa di strès pòst troumátiko PTSS i tambe di depreshon. “Andy no ta apto aworaki pa kuida su mes. No ta bai bon kuné.”
Negoshashon
Durante tratamentu di e kaso abogado general Ton van der Schans a bisa ku pago di daño i perhuisio den e kaso aki ta na su lugá, pero e ta haña ku Ministerio Públiko no por bai sin mas di akuerdo ku e kompensashonnan ku ta pidi. Ministerio Públiko algun tempu pasá a duna di konosé di ke negoshá riba altura di e kompensashonnan. “E kaso aki a tuma lugá den tempu ku Antia Hulandes tabata eksistí ainda. Ken ta e susesor hurídiko di Antia? Ta Kòrsou mester bai paga òf Hulanda?”
Knoops-Hamburger tin un kontesta pa e pregunta ei. “I don’t care. No ta problema di e dos hendenan aki ku ta víktima di OM. Laga nan bringa esei tras di bastidor.”
Outor: Belkis Osepa