E tim di Opsporing Verzocht – Potrèt: Nationale Politie
HILVERSUM – Polis na Hulanda awenochi den e programa di televishon Opsporing Verzocht ta duna atenshon amplio na e asesinato di Marlon Fidanque. E biaha aki e programa ta dirigí su mes enfátikamente na e televidentenan den Karibe i ta hasi esaki na papiamentu.
Riba e djasabra anochi fatal di 19 di mart di e aña aki un tiradó te ainda deskonosí ta tira riba Marlon Fidanque (31) i su ruman hòmber, djis despues ku nan a yega na un kas na Houtsnijdershorst na Apeldoorn. Marlon Fidanque ta muri mes ora, su ruman hòmber ta keda gravemente heridá. Un habitante femenino tambe ta haña bala den su brasa. E ta logra si di pone su mes i su kuater yunan fuera di peliger.
Segun polis e víktimanan, òf por lo ménos un di nan, tabatin un konflikto ku un hende. Awe nochi ta suptitulá e transmishon tokante e tiroteo fatal na papiamentu, pasobra Hustisia na Hulanda ta tene kuenta ku e posibilidat ku tin hende na e islanan karibense ku por sa algu mas di e kaso.
Último lunanan a drenta algun tep kaba ku a pone ku a yama testigu nobo. Polis tin masha gana di sa tambe si tin hende ku a mira e víktimanan kore baiskel djis promé ku e insidente, pasobra nan ke sa si kisas e malechor a sigui nan for di e ora ei.
15 mil euro di rekompensa
Aktualmente reshèrshi ta pensa ku tabata trata di un malechor so. Testigunan ta bisa ku nan a mira un hòmber di koló, posiblemente antiano, bistí na paña skur. Probablemente un persona entre 20 pa 30 aña di edat. Polis ke sa ta ken e hende aki por ta i di kiko e konflikto tabata trata. E dunadó di e tep ku lo pone ku por solushoná e kaso aki, ta haña un rekompensa di 15 mil euro.
Sigui e transmishon
E transmishon ta awe nochi 20.30 or (14.30 or na Kòrsou) na NPO 1. Por siguié live tambe riba e website di polis: live.politie.nl
Outor John Samson