René Herdé (Aruba, meimei) ta deliberá ku e delegashon di Sint Maarten durante un skòrsmentu di e deliberashon – Potrèt: Pieter Hofmann
DEN HAAG – E paisnan na e Deliberashonnan Interparlamentario di Reino (IPKO) parse ta logra alkansá un kompromiso.
Aruba a proponé pa laga e resolushon den man di e konseho di maneho di Konseho di Estado. E verediktonan di e konseho di maneho ta obligatorio.
E paisnan ta studiando e proposishon di e parlamentario René Herdé (Aruba). Mañan ta firma un teksto final i un lista di palabrashon.
Tres punto di salida
Ku e proposishon di Herdé e tres puntonan di salida di un areglo di disputa ku anteriormente a kumbiní ta keda intakto: un instansha independiente ta dikta sentensia obligatorio tokante disputa estriktamente hurídiko den Reino.
E paisnan karibense na prinsipio tabata ke pa Korte Supremo husga disputa. Pero Korte Supremo ta haña ku e kámara di gobernashon di Konseho di Estado por husga mihó tokante di esaki.
Disputa di maneho
No tur disputa ta estriktamente hurídiko. Por presentá asuntunan di maneho na e departamento di konseho di Konseho di Estado. Veredikto tokante di esaki no ta obligatorio.
Aserká
Tòg na kuminsamentu no tabata mustra manera lo a bini un proposishon riba mesa. Tantu e delegashonnan oropeo komo esnan karibense tabata reprochá otro di ‘no aserká otro’.
Elmer Wilsoe (meimei) ta papia na IPKO. André Bosman (man robes, mirá di patras) ta skucha – Potrèt: Pieter Hofmann
Krítika
Tambe tabatin krítika riba e proposishon. André Bosman (Hulanda) a mustra riba e distinshon chikí entre asuntunan outónomo i di Reino. Segun e, e distinshon aki no ta kla tur ora. El a referí na e kaso Murray. A skual Hulanda den esaki pasobra e detenido James Murray a risibí un trato inhumano den e parti karibense di Reino.
E parlamentario tin miedu di un senario kaminda e paisnan karibense no ke pa Den Haag mete, pero kaminda ta keda tene gobièrnu hulandes responsabel si algu bai malu. Bosman: “No por ta asina ku e areglo di disputa ta overrule e funshon di garantia.
Outor Pieter Hofmann