E karta a kousa hopi konsternashon, unda a kreá un impreshon ku lo a bini un diferensia entre e diploma Kurasoleño i esun Hulandes. – Portrèt: Deya Mensche
WILLEMSTAD – E periodo di eksámen pa studiantenan di HAVO i VWO ta tras di lomba. Mirando e ahustenan pa diploma ku a keda introdusí na yanüari di e aña aki pa minister Irene Dick, e studiantenan ta wardando e resultado di nan eksámen ansiosamente.
E aña eskolar 2015 –2016 tabata plega ku kontroversia pa motibu di e ahustenan akí, unda mayornan i studiantenan preokupá a protesta despues ku un karta entre minister Dick i Hulanda, a lek den prensa.
Deya Mensche a kombersá ku Marion Thomasia Keiren, Rector di Radulphus College
E karta a kousa hopi konsternashon, unda a kreá un impreshon ku lo a bini un diferensia entre e diploma Kurasoleño i esun Hulandes. Pa e studiante gradua, e mester haña un averahe di 5.5 pa e materianan Hulandes, Ingles i Matemátika i por haña solamente un 5 pa unu di e tres materianan aki. Hulanda a introdusí e ahustenan pa diploma di HAVO i VWO pa garantisá e nivel di e diploma.
E ahustenan aki no ta sorprende Etienne Ys, presidente di Tur Ta Konta, “Asta Hulanda a observa ku e nivel di entre otro matemátika a bai atrás bou di su mes studiantenan. Na yanüari e ahustenan a keda introdusí, bou di hopi insertidumbre na Kòrsou, pa asina su diploma tambe mester kumpli ku e rekisitonan stipulá pa Hulanda.
Efekto di ahuste
Sra. Martha Dijkhoff, funshonario di departamentu di enseñansa, a atmití ku no a duna e dosentenan ni direktiva eskolar instrukshon spesífiko pa prepara e alumnonan pa e ahustenan di e resultado di eksámen. E ahustenan te ainda ta konta solamente pa e eksámen di HAVO, i otro aña lo introdusí esun pa VWO. Segun rector di Radulphus College Sra. Marion Thomasia – Keiren ta importante pa prepará e alumnonan mas mihó posibel.
“Nos a introdusí un èkstra eksámen pa e materianan prinsipal Hulandes, Ingles i Matemátika, paso e introdukshon di e ahustenan tabata relativamente diripiente”, ela splika. Según Martha Dijkhoff, e eksámen a keda riba mes un nivel i ta e konteo di punto so a bira otro. Pero pa Riangelo Servanie, kende ta den HAVO 5, e eksámennan tabata más difísil. “E preshon ta más tantu i e grado di difikultat di kada eksámen a subi, espesialmente esnan di Hulandes i Inglés”, ela splika.
Reklamo masal riba eksámen
Esaki a trese un avalancha di reklamo di studiantenan den reino hulandes, i mas ku 205 mil keho a keda vosvera riba e wepsait www.examenklacht.nl. Espesialmente e materianan prinsipal a haña hopi reklamo. Pa Hulandes tabatin 10 mil reklamo fo’i kasi 60 mil partisipante, i pa Matemátika A tabatin 6552 reklamo, fo’i mas ku 41 mil partisipante.
Pa Matemátika B, tabatin 2152 reklamo, fo’i kas 16 mil partisipante i pa Inglés, tabatin mas ku 26 mil reklamo, fo’i kasi 60 mil partisipante. Según Dijkhoff, ainda no por a determina kuantu studiante di Kòrsou a hasi reklamo riba e wepsait, pero a indiká ku por a akudí na Examenlijn di ETE i via Inspekshon. “Te ainda nos no tabatin kehonan riba e materia prinsipal, ni riba e ahustenan”, ela splika.
Deya Mensche a kombersá ku studiantenan di Havo i VWO
Si Dijkhoff a indiká ku Kòrsou lo hasi un evaluashon di e resultadonan di èksamen HAVO i VWO i lo bini ku pensamentunan kon mester atendé ku e ahustenan, si resultá ku esaki tin influensia negativo riba e porsentahe di alumno ku a gradua na 2015/2016. Rèktòr Thomasia – Keiren di su partí ta spera ku e resultadonan ta keda mes un bon ku e añanan anterior. “Pero mi ta teme un redukshon chikitu. Mi ta antisipá ku en futuro, e alumnonan lo traha pa alkansá e resultadonan rekerí i lo hasi más esfuerso”, ela konkluí.
Outor: Deya Mensche