Marisol Lopez-Tromp – portrét: Ariën Rasmijn
ORANJESTAD — Durante un conferencia yama na ultimo ora diamars merdia, presidente di parlamento di Aruba Marisol Lopez-Tromp a anuncia cu e ta bandona fraccion di AVP y sigui den parlamento como parlamentario independiente y presidente di Staten te cu eleccion.
Motibo pa esaki ta cu segun Lopez-Tromp lider y miembronan di fraccion di e partido lo no a atende debidamente cu e incidente tres siman pasa den cual su persona y vice-presidente di parlamento Chris Dammers (AVP) a agredi otro fisicamente. Ambos lider di partido Mike Eman y lider di fraccion di AVP Rene Herdé ta declara cu nan no a spera Lopez-Tromp su decision.
Marisol Lopez-Tromp, prome minister Mike Eman y lider di fraccion di AVP Rene Herdé na palabra
Durante su conferencia di prensa, cu a tuma lugar despues cu el a combersa cu gobernador Fredis Refunjol pa notifike riba su decision, Lopez-Tromp a declara di no ta mucho contento cu publicacionnan y declaracionnan haci dor di su mesun copartidarionan durante e ultimo simannan despues di e incidente cu Chris Dammers. E ta haya e manera cu ela a wordo trata ‘inaceptabel’.
Ambos lider di partido Mike Eman y lider di fraccion di AVP Rene Herdé ta desmennti cu no a atende cu e caso. Ambos ta bisa cu a tene contacto cu Lopez-Tromp. Eman te hasta lo tabatin un cita planea cu e presidente di parlamento. Herdé ta bisa cu e ta spera ainda cu lo por yega na un solucion den cual Lopez-Tromp no ta bandona e partido.
Autor Ariën Rasmijn