E matanan aktual lo bai pèrdí si muda i e duo mester kuminsá kompletamente di nobo – Potrèt: Elisa Koek
WILLEMSTAD – Curaçao Winery for di kuminsamentu tabata sa ku e hür di e tereno di Curaçao Airport Partner (CAP) tabata pa un tempu indefiní i ku CAP por a ‘eksihí’ e tereno un ora pa otro. Esaki a sali for di e interkambio di email entre e dos partidonan, ku a kai den man di Caribisch Netwerk.
“CAP por terminá e akuerdo aki riba kada momentu kontal ku nan anunsiá esaki diesdos luna delantá”, por lesa den un email entre e dos partidonan. Riba 3 di aprel 2014 Curaçao Winery a konfirmá den un otro mail ku e ta di akuerdo ku e areglo aki.
Eksaktamente dos siman pasá a sali den notisia ku Curaçao Winery ta pasando den mal tempu pasobra CAP ta terminá e kòntrakt di hür. Dos aña pasa e dos rumannan Visscher (un ruman muhé i un ruman hòmber) a kuminsá Curaçao Winery riba e tereno di Landhuis Hato, pero nan mester bai pasobra CAP mes ke usa e tereno.
Pilot
Segun e bosero di CAP, Diana Martis, Curaçao Winery semper tabata un pilot. Ta pa e motibu aki a sera e akuerdo di lease pa un tempu indefiní. “Pero no tabata trata di esaki niun ora so ora nos a kuminsá”, doño di Curaçao Winery Roelof Visscher ta bisa. Pero for di e interkambio di email entre e dos partidonan ta sali ku e hür tabata pa un temporada indefiní i ku CAP por a ‘eksihí’e tereno un ora pa otro masha bon.
Riesgo
Visscher ta bisa ku no ta lógiko pa start un plantashon di biña djis pa purba. For di publikashonnan di Curaçao Winery tambe ta sali ku ta un proseso di durashon largu. “Nos a palabrá un kòntrakt di sinku aña ku CAP, pero e gastunan di esaki tabata ridíkulamente haltu, pues nos a skohe pa e opshon aki”, Visscher ta bisa.
E echo ku un kòntrakt pa ‘tempu indefiní’ lo enserá e riesgo ku CAP lo por ke e tereno bèk, Visscher a aseptá. “Komo empresario bo ta tuma riesgo. Ademas no tabatin niun sorto di kestion ku CAP lo ker a usa e tereno den e diessinku añanan binidero. Pió ainda, nan no tabata sa mes ku e tereno ta di nan”, segun e doño di Curaçao Winery.
CAP ke konstruí un hangar riba e tereno ku Curaçao Winery ta usando. For di interkambio di email ta sali ku CAP a bisa Curaçao Winery esaki na novèmber di 2015. Despues di un kombersashon entre e dos partidonan CAP a indiká ku Curaçao Winery lo haña algun luna èkstra pa saka e último kosecha: te yanüari di 2017.
Despistá
“Si, legalmente CAP a trata e asuntu manera mester ta”, Roelof Visscher ta di akuerdo. Pero nan a despistá nos, pasobra dia ku nos a kuminsá no tabatin e plannan pa konstrukshon. Nan ker a usa maksimalmente un pida chikitu.”
Tambe Visscher ta enfatisá e mal koperashon entre CAP, CuraçaoCivil Aviation Authority (CCAA) i Curaçao Airport Holding (CAH). CCAA ta bisa ku Curaçao Winery mester bai, pasobra e wendreifnan ta atraé para. Esaki ta trese peliger pa tráfiko aéreo. Ku CAH Curaçao Winery tin un akuerdo di hür di tereno pa sinkuenta aña. “Aparentemente CAH i CAP no a palabrá ku CCAA kiko nos tabata bai hasi ku e tereno. Bo ta sali for di e punto ku nan a palabra esaki ku otro, un ta bèrdè?” , Visscher ta reakshoná.
Diana Martis di CAP ta duna komo último reakshon ku CAP no tin relashon mas aleu ku CAH. “Nan ta un entidat kompletamente diferente. E palabrashonnan ku CAH tin ku Curaçao Winery ta diferente for di esnan di nos. Direktor di CCAA, Oscar Derby, ta bisa ku tin un investigashon ta kore di e relashon entre e hòfi di wendreif i dalmentu aereo, komo ku e aña aki tabatin diferente notifikashon.
Sosten di Kòrsou
Pa medio di sosten di vários banda na Kòrsou, entretantu Visscher a bira mas optimista. “Ku ayudo di gobièrnu i komunidat m’a haña speransa atrobe. Kòrsou tin sufisiente lugá bunita kaminda mi por sigui.” E matanan aktual si lo bai pèrdí si muda i e duo mester kuminsá kompletamente di nobo. “Ta bai dura dos pa tres aña atrobe promé ku e matanan a kaba di krese”, Visscher ta bisa. “Esaki por bai kosta un mion fásil.”
Outor Elisa Koek