André Bosman – potrèt: Jamila Baaziz
ORANJESTAD – Miembro di Tweede Kamer André Bosman di VVD no tin nodi di konta ku sosten di parlamento arubano si ta trata di su proposishon pa e lei ‘Regulashon di establesimentu di hulandes di Aruba, Kòrsou i Sint Maarten na Hulanda’. Djabièrnè tur 21 miembro di Staten di Aruba a vota pa un moshon kaminda kolegialmente ta pidi Bosman pa revoká e proposishon di lei. “Ta promé bia ku mi a yega di eksperensiá algu asina”, lider di MEP Wever-Croes ta deklará.
E miembronan di parlamentu arubano den e moshon ‘primariamente ta apelá kolegialmente na e miembro di Tweede Kamer Bosman pa revoká e proposishon di lei’.
Na mes momentu ta apelá na gobièrnu di Aruba pa ‘huntu ku e otro gobièrnunan pensa konstruktivamente riba un trato efektivo pa diferente problema, entre nan e problema di hóbennan kriminal den Reino’. Banda di esaki parlamento arubano kompletu ta apelá na e koleganan na Den Haag pa rechasá e proposishon di lei di Bosman.
‘Diskriminante’
Segun e moshon e lei di Bosman lo ta kontra di e prinsipio di ‘nashonalidat hulandes individí’. Tambe entre otro Konseho di Oropa, Kolegio pa Derecho Humano, Komishon oropeo kontra rasismo i intoleransia (ECRI) i diferente spesialista riba e tereno di derecho humano i derecho di estado i gobièrnu lo a indiká ku e proposishon di lei ta diskriminante.
Banda di esaki e sifranan ku ta sostené e lei di Bosman lo ta diskutibel. Ademas e lei di Bosman lo hasi e problemátika di integrashon rònt di hende hulandes karibense mas pió na lugá di mehor’é . Parlamento arubano ta mira invershon den un kombatimentu di pobresa duradero, envolvimentu di tata, trato di problemátika di droga i arma, i un maneho berdadero di derecho humano den henter Reino komo alternativanan mihó ku un maneho mas severo di e maneho di establesimentu.
E partidonan den koperashon
No sa sosodé hopi ku tur partido den parlamento arubano ta koperá na un moshon pa despues aprobá esaki unánimemente. Esun ku a tuma e inisiativa pa e moshon tabata e miembro di Staten di AVP Desiree De Sousa-Croes.
Tantu lider di MEP Evelyn Wever-Croes komo e presidente di frakshon di PvdA René Herdé ta konfirmá ku lider di PDR Andin Bikker i miembro di frakshon di MEP Ady Thijssen a kontribuí na e teksto. No a vota individualmente djabièrnè. Tur frakshon a sostené e moshon i firm’é. Djaluna 27 di yüni ta trata e proposishon di lei di Bosman den Tweede Kamer na Den Haag.
Outor Ariën Rasmijn