Minister Koenders (Asuntunan Eksterior) – potrèt: Tweede Kamer
DEN HAAG – Gabinete hulandes no ta ferwagt un fluho masal di refugiado venesolano pa Aruba, Boneiru i Kòrsou (islanan ABC) si e situashon na Venezuela bira hopi mas pió. Asina minister Bert Koenders (Asuntunan Eksterior) a bisa djaweps den un debate ku Tweede Kamer.
Segun e minister venesolanonan ku hui lo bai e paisnan bisiña mas lihé ku e islanan ABC. Patruyanan èkstra di wardakosta te awor no ta duna un imágen di imigrashon oumentá, segun e minister. Segun Koenders no tin motibu tampoko pa introdusí un obligashon di visa (temporario) pa venesolano.
Senario di maldishon
VVD, D66, CDA i PVV ta preokupá si Reino aktualmente ta prepará pa un senario di maldishon, kaminda refugiado den boto masalmente lo sali pa e islanan ABC. Ya lunanan largu tin intrankilidat polítiko na Venezuela, ku un skarsedat enorme di kuminda, awa, koriente i remedi.
Na Kòrsou na yüni polis a detené dos diferente grupo di refugiado di boto. Tambe tin señal fuerte ku e venesolanonan awor ta drenta mas tantu ku avion, pa despues disparsé den ilegalidat. Un prekupashon grandi ku parlamento hulandes tin ta ku no tin maneho i legislashon di asilo na e islanan. Poko tempu pasá Kòrsou no tabata sa kiko e hasi ku un solo refugiado di Syria i a disidí di ser’é.
Deliberashon eksakto
E minister no ke bisa kon e senarionan ku gobièrnu hulandes ta tene kuenta kuné lo mustra. Datonan di entrada i salida riba e islanan ta mas o ménos stabil, segun e minister. E ta sigurá parlamento ku ta vigilá e situashon riba e islanan diariamente i ku tin deliberashon entre e ministerionan di Asuntunan Interior, i Relashonnan den Reino i Defensa, embahada na Venezuela i e paisnan karibense outónomo den Reino i Representante di Reino na Boneiru.
André Bosman (VVD) – potrèt: Tweede Kamer
Moshon tokante Kòrsou
Parlamentario André Bosman tin tiki konfiansa ku polítika na Kòrsou ta prepará pa un posibel yegada di refugiado di boto. Su preokupashonnan a lanta pa motibu di un reunion di komishon na Kòrsou pasobra miembro di Staten di Pais, Alex Rosaria, a puntra: ‘Kon seif nos frontera ta?’.
Segun Bosman ta un señal ku Kòrsou no tin e situashon sufisientemente bou di kòntròl. Bosman ta entrega un moshon na nòmber di VVD kaminda ta pidi gobièrnu hulandes pa insistí riba medida di migrashon i asilo na Kòrsou. E minister ta sostené e moshon aki.
Outor John Samson