Boroto di demonstrante a stroba e konmemorashon solèm di sklabitut – potrèt: Sam Jones
AMSTERDAM – Demonstrantenan seriamente a stroba e konmemorashon nashonal di abolishon di sklabitut den Oosterpark na Amsterdam.
E grupo di resistensia ta rabiá ku Antoine Deul, presidente di e instituto di sklabitut NiNsee, ku a parti e konmemorashon tradishonal riba promé di yüli den konmemorashon riba 30 di yüni i selebrashon riba promé di yüli. I asina e konmemorashon djaweps a sosodé ku hopi bochincha.
Motibu pa e kambio
E konmemorashon di abolishon di sklabitut hulandes te ku e aña aki semper tabata riba promé di yüli. E Instituto Nashonal di Pasado i Herensia di Sklabitut Hulandes (NiNsee) e aña aki a disidí pa no tene e konmemorashon riba un dia sino riba dos dia. Konmemorá riba 30 di yüni i selebrá riba promé di yüli. For di eksperensia di añanan anterior a sali ku e selebrashon, ku muzik duru i boroto di hende ku ta papia duru ta stroba e konmemorashon. Esta, esei ta e splikashon di NiNsee.
Sin diálogo
Un grupo di resistensia bou di guia di Iwan Leeuwin no ta di akuerdo ku esaki. Nan ta haña ku promé di yüli ta e dia ofisial di selebrá abolishon di sklabitut. Pasobra ta riba promé di yüli 1863 a abolí sklabitut hulandes den e kolonianan anterior Sürnam i Korsou i e demas islanan di Antia hulandes. NiNsee a invitá e grupo di resistensia delantá na e konmemorashon pa tene un kombersashon si, pero no a resultá un kombersashon ku kontenido. E desishon pa parti e konmemorashon tambe tabata tumá kaba i pa e grupo di resistensia esaki no ta un punto di salida pa un kombersashon.
Mediadó Clarence Seedorf
Asina a resultá un protesta ku hopi boroto na e konmemorashon den Oosterpark ku mester tabata solèm. Lider di resistensia Leeuwin a entregá alkalde Van der Laan un petishon ku e teksto: A kita promé di yüli for di nos. Riba 30 di yüni ainda ta torturá nos antepasadonan sklabisá. Mester koregí e eror aki. Despues di mediashon di èks hungado di futbòl profeshonal Clarence Seedorf, kende tambe tabata presente pa e seremonia, a palabrá ku lo trata un bia mas pa tene un kombersashon.
Outor Sam Jones