Chery-Anne Bernadina ta posa ku su diploma i su mama orguyoso
WILLEMSTAD – Un ehèmpel pa su kompañeronan na Kòrsou, ta esei Chery- Anne Bernadina ke ta. E yu di Kòrsou di 21 aña di edat kuminsamentu di e luna aki a haña su diploma di Promé Mekániko di Mantenshon di Avion na Deltion College na Zwolle. E ta e promé mekániko di avion binidero di Kòrsou. “Un hende muhé no tin nodi di semper traha den un ofisina, e por traha un trabou tékniko tambe sin problema. Kere den bo mes.”
For di den enseñansa básiko Chery-Anne tabata sa ku e ker a bira mekániko. Si e outo di su mama mester a bai garashi, e tabata bai huntu ku paña èkstra i e tambe por a tofer ku outo. “Mi ta un hende ku mester ta aktivo. Tras di un computer no ta nada pa mi. Pero semper mi tabata ke mas i mekániko di outo tabata parse mi muchu simpel.”
Soño
Ounke trempan e tabata sa kaba kiko e ke tur hende no tabata tum’é na serio. “Bo por bien bisa kasi niun hende. Nan tabata bisa: ‘bo ta mucha muhé, bo mester traha den un ofisina. Un dama ku man shushi, no por.’ Dankidjo mi tin un mama fuerte ku semper ta sostené mi. El a bisa mi ku si esaki ta mi soño mi mester bai p’e. No ta importá kiko otro hende bisa.”
Chery-Anne ta bisa ku e lo no a yega asina leu si el a skucha otro hende. “Mi ta masha di fókùs. Mi a bai Hulanda ku un meta so: Esaki mi mester logra, esaki mester sosodé. Nan ta ripará esaki. Na skol aki e dosentenan ta ripará lihé ku bo ta bai p’e. Nan a duna mi tur sosten for di den kuminsamentu.”
Pika
Komo promé mekániko di mantenshon di avion bo ta mantené i drecha avion i piesa di avion. Den e estudio di tres aña por ehèmpel e studiantenan ta solushoná defekto na e sistemanan hidrouliko, mekániko i eléktriko di e parti abou, e partinan di e rabu i di e bòdi. Un estudio pisá segun Chery-Anne.
JSF
Ku su diploma Chery-Anne ta bai traha na e kompania hulandes di teknologia aéreo Aeronamic na Almelo. Ei el a kore stazje tambe den su último aña. E kompania ta konosí pasobra e ta bai traha sistema high tech spesial pa e djèt di atake JSF. E no por konta kiko eksaktamente e mester hasi. “Ta sekreto. Pero di tur manera lo mi siña mas einan. Ke men por lo pronto e chèns ku mi ta bin traha serka boso na Kòrsou ta chikí.
Outor Dick Drayer